سەرۆكی حكومەتی هەرێمی كوردستان داوا لە هاووڵاتیانی مەسیحی، تورکمان، ئێزدی، شەبەک و تەواوی پێکهاتەکان دەکات ئارامیان هەبێت و لە بەرامبەر هەڕەشەكان وڵاتەكەیان بۆ دوژمنان چۆڵ نەكەن.
نێچیرڤان بارزانی، سەرۆكی حكومەتی هەرێمی كوردستان بە بۆنەی ساڵی نوێ و جەژنی لەدایكبوونی مەسیح، وتارێكی پێشكەشكرد و رایگەیاند، درك بە دەردەسەری هاووڵاتیانی خۆشەویستی مەسیحی دەكەین، بەڵام نابێت لەبەرامبەر هەڕەشەكان وڵاتەكەمان بۆ دوژمنان چۆڵبكەین.

بارزانی هەروەها گوتی،" چەندین وڵات بەهانای کوردستانەوە هاتوون، هەرێمی کوردستان وەک هەمیشە بووەتە دوورگەیەکی ئاشتی و خەونی گشت پێکهاتەکانی ئەم وڵاتە پێکەوە ژیانی ئاشتیانەیە". گوتیشی،" هەموو پێکهاتەکانی کوردستان بە هانای مەسیحییەکانەوە هاتن، لە هەفتەی رابردوودا چەندین گوندی مەسیحییەکان رزگارکران و هەوڵی جیددی رزگارکردنی دەڤەرەکانی مەسیحییەکان جێگەی خۆشحاڵیمانە".

سەرۆكی حكومەت لە وتارەكەیدا كە لە ناحیەی عەنكاوەی شاری هەولێر ئەمشەو 24/12/2014 پێشكەشیكرد، ئاماژەی بۆ ئەوە كرد كە مەسیحییەکان رەگ و ریشەی هەزاران ساڵەیان لەو وڵاتەدا هەیە، هەموو ئایینەکان بۆ ئاشتی و ئارامی و یەکترقبووڵکردن هاتوون و ئەوانیش دەتوانن لێرە دابونەریتی خۆیان بپارێزن.







رووداو