د.عەلی قەرەداخی، ئەمینداری یەکێتی جیھانی زانایانی موسڵمان لە پەیامێکدا پیرۆزبایی سەرکەوتنەکانی ھێزی پێشمەرگە لە مەسعود بارزانی، سەرۆکی ھەرێمی کوردستان و مستەفای سەید قادر، وەزیری پێشمەرگەو سەرجەم لایەنە سیاسییەکان دەکات.

قەرەداخی دەڵێت:" سەرکەوتنی ھێزەکانی پیشمەرگەی کوردستان لە شەڕەکانی جەلەولاو سەعديیەو شنگال، مایەی دڵخۆشی بوو بۆ ھەموو لایەکمان، چونکە ئەم سەرکەوتنانە لەلایەک نیشانەی ئیرادەی بەھێزی گەلی کوردستان بوون بۆ رووبەڕووبوونەوەی ھێزی تاریکپەرست و رەشی گرووپی تیرۆریستی داعش، کە پێچەوانەی ھەموو بنەمایەکی ئایینی و مرۆڤ دۆستی بوو".


ئەمینداری یەکێتی جیھانی زانایانی موسڵمان جەخت لە سەر ئەوە دەکاتەوە كە سەرکەوتن و پێشڕەوی پێشمەرگە وانەیەک بوو بۆ ھەموو ئەو ھێزو لایەنانەی لەو بڕوایەدابوون بەم رێگایە دەتوانن شکست بە حکومەتی ھەرێمی کوردستان بھێنن.

عەلی قەرەداخی لە بەیاننامەکەدا دەڵێت:" بەبۆنەی ئەم سەرکەوتنانەوە پیرۆزبایی لە سەرۆکی ھەرێمی کوردستان و وەزیری پێشمەرگەو ھەموو ھێزو لایەنە سیاسییەکان و پێشمەرگە قارەمانەکان و ھاووڵاتیانی بەشەرەفی کوردستان دەکەم، داواكارم کە یەک گوتار و یەک ھەڵوێستیان بپارێزن".

لە بەشێکی دیکەی بەیاننامەکەی قەرەداخیدا ھاتووە:" ھیواموایە ئەمە سەرەتای دروستکردنی سوپایەکی یەکگرتووی کوردستانی بێت، کە وەک دامەزراوەیەکی بەھێز کار بکات و موڵکی ھەموو ھاووڵاتییەکی کوردستان بێت و ھەموو کۆمەکییە نێودەوڵەتییەکانیش لەچەک و مەشقی سەربازی سەرەتای قۆناخێکی نوێ بێت بۆ بنیاتنان و گەشەپێدانی سوپایەکی کوردستانی یەکگرتوو".