به‌ره‌به‌یانى ئه‌مڕۆ چه‌كدارانى داعش له‌ نزیك گوندى گاباراى لاته‌نیشتى چیاى شه‌نگال هێرشى كرد و ئامانجیشى له‌م هێرشه‌ تێكدانى مه‌زارگه‌یه‌ك بوو به‌ناوى شێخ حه‌سه‌ن .

له‌و باره‌وه‌ سه‌عید شنگالى به‌رپرسى لقى 17ى پارتى دیموكراتى كوردستان له‌ په‌یوه‌ندیه‌كدا به‌ كوردستان تى ڤى ڕاگه‌یاند كه‌ چه‌كدارانى داعش به‌ سوود وه‌رگرتن له‌ خراپى دۆخى كه‌ش و هه‌وا و بوونى ته‌م و مژێكى زۆر، هێرشى كرده‌ مه‌زارگه‌یه‌ك له‌ نزیك گوندى گابارا، كه‌ نزیكه‌ى 15 كیلۆمه‌تر له‌ سه‌نته‌رى شنگاله‌وه‌ دووره‌.

سه‌عید شنگالى گووتیشى هێزه‌كانى پێشمه‌رگه‌ به‌رپه‌رچى ئه‌م هێرشه‌ى چه‌كدارانى داعشیان دایه‌وه‌ و تاكو ئێستاش شه‌ڕوپێكدادانه‌كان به‌رده‌وامیان هه‌یه‌، به‌رپرسى لقى 17 سه‌باره‌ت به‌ ڕه‌وشى ئاواره‌كانى چیاى شنگال گووتى، كه‌ به‌ هۆى سه‌رما و سۆڵه‌ و كه‌مى خۆراك، ڕه‌وشى ئاواره‌كان باش نییه‌، بۆیه‌ له‌م ڕووه‌وه‌ داواى هاوكارى له‌ حكومه‌ت و ڕێكخراوه‌كان ده‌كه‌ین بۆ ئاواره‌كانی سه‌رچیای شنگال.