ئەنجوومەنی ئاساییشی هەرێمی کوردستان ڕایگەیاند، چەند تیرۆریستێکی سەر بە تیرۆریستانی داعش، لە پارێزگای کەرکووک دەستگیر کردوون کە، تۆمەتباری سەرەکیی تەقینەوەی 19/11/2014 ی بەردەم پارێزگای هەولێرن، ئەنجوومەنی ئاساییش لە ڕاگەیەنراوەکەیدا هاوکات جەخت دەکاتەوە کە، هەروەها لە لێکوڵینەوە سەرەتاییەکاندا بەڵگەی دیکەیان دەست کەوتوون کە، هەمان ئەم گرووپە دەستیان لە تەقینەوەی 23/8/2014ی هەولێر و تەقینەوەی 4/12/2014ی کەرکووکدا هەبووە.

دەقی راگەیەندراوێک لە ئەنجوومەنی ئاساییشی هەرێمی کوردستانەوە :


بە هاووڵاتیانی خۆشەویستی هەرێمی کوردستانی رادەگەیەنین کە، دوای دەستکەوتنی چەند سەرەداوێک و بەدواداچوونی ورد، هێزەکانی ئاساییشی هەولێر بە هاوکاریی ئاساییشی کەرکووک توانییان لە چەند چالاکییەکی تایبەتدا، چەند تیرۆریستێکی سەر بە بەناو دەوڵەتی ئیسلامی(داعش)، لە پارێزگای کەرکووک دەستگیر بکەن. ئەم کەسانە تۆمەتباری سەرەکیی تەقینەوەی رێکەوتی 19/11/2014 ی بەردەم پارێزگای هەولێرن، هەروەها لە لێکوڵینەوە سەرەتاییەکاندا بەڵگەی دیکە دەست کەوتن کە، هەمان ئەم گرووپە دەستیان لە تەقینەوەی رۆژی 23/8/2014ی هەولێر و تەقینەوەی 4/12/2014ی کەرکووکدا هەبووە.
تیرۆریستانی ئاماژە پێکراو، لە لێکۆڵینەوە سەرەتاییەکاندا بە هەبوونی بەڵگەی بەهێزەوە دانیان بە تاوانەکانیان ناوە. لە چوارچێوەی رێکارە یاساییەکاندا لێکۆڵینەوە لەم تۆمەتبارانە بەردەوامە و لە ماوەیەکی نزیکدا هاووڵاتیانی ئازیزمان لە ئەنجامەکان ئاگادار دەکەینەوە.

ئەنجوومەنی ئاساییشی هەرێمی کوردستان
6/12/2014