دوای ئەوەی هەندێك لە راگەیاندنەكان بڵاویانكردەوە، كە ژمارەیەكی زۆری هێزی پێشمەرگە بە هۆی خواردنی ژەهراوی، ژەهراویكراون، فەرماندەیەكی هێزی پێشمەرگە رەتیدەكاتەوە و دەڵێت كە ئەو هەواڵانە هیچ بنەمایەكیان نییە.

ئەحمەد گەردی، فەرماندەی هێزی پێشمەرگە لە كۆبانێ رایگەیاند، "ئەو هەواڵانەی باس لە ژەهراویبوونی ژمارەیەكی زۆری پێشمەرگە لە كۆبانێ دەكەن، هیچ بنەمایەكیان نییە و دوورن لە راستی".

ئەحمەد گەردی سەبارەت بەو دەنگۆیانە گوتی، "نزیكەی 12 پێشمەرگە تووشی حاڵەتی سكچوون بوون، كە پێدەچێت بەهۆی ئاووهەوا بێت، بەڵام هیچ پەیوەندی بە خواردنی ژەهراوییەوە نییە و شتێكی ئاساییە".

ئەو فەرماندەیەی هێزی پێشمەرگە لە كۆبانێ جەختی لە باشیی تەندروستی پێشمەرگەكان كردەوە و گوتی" هەموو پێشمەرگەكان ئێستا باری تەندروستییان جێگیرە و هیچ كێشەیەك نییە".

ئەحمەد گەردی سەبارەت بە دۆخی ئێستای كۆبانێ گوتی، "شەڕ و پێكدادانەكان بەردەوامن و لە چەند ناوچەیەك توانیومانە چەند سەت مەترێك پێشڕەوی بكەین".










رووداو