لە دوای تەقینەوەكەی ناحیەی گوڵەجۆ (كەوكەس)، هێزەكانی ئاسایشی كفری خۆكوژێكیان بە ئۆتۆمبێلێكی بارهەڵگری بۆمبڕێژكراو دەستگیركرد، كە بەنیاز بوو بازگەی ئاسایشی گردە گۆزینە لە نێوان قەرەبڵاغ و شێخ لەنگەر بكاتە ئامانج.

سەرچاوەیەك لە ئاسایشی كفری بە تۆڕی میدیایی رووداوی راگەیاند، خۆكوژەكە رێگای لێ هەڵە بووە و ئۆتۆمبێلەكەی لەسەر رێگا وەستاندووە و بەرەو گوندی حاجیلەر رایكردووە، دواتر هێزەكانی ئاسایش بەمەیان زانیوە و دەستیان بەسەر ئۆتۆمبێلێكەدا گرتووە و خۆكوژەكەشیان لە نێو گوندی حاجیلەر دەستگیركردووە.

ئەو سەرچاوەیەی ئاسایشی كفری گوتیشی، خۆكوژەكە بە رەگەز كوردە و لە دایكبووی ساڵی 1987ـە و لە كاتی لێكۆڵینەوە ئاشكرایكردووە، كە دوو كەسی دیكەی لەگەڵدایە، ئاسایشیش هەردوو كەسەكەی لە گوندی ئیسلاح دەستگیركرد.

دواتر تیمەكانی ئەندازیاریی تەقەمەنی بۆمبی نێو ئەتۆمبێلەكەیان پووچەڵكردەوە، كە بەرمیلێكی تەقەمەنی و نزیكەی دوو تەن مادەی سیفۆر و چەندین گوللەی هاوەن و تۆپی 106ی هەڵگرتبوو.

ئەو سەرچاوەیە گوتیشی، خۆكوژەكە پشتێنەیەكی بۆمبڕێژكراوی لە خۆ بەستبوو و لە كاتی دەستگیركردنیشی دەركەوت، كە هۆشی لەسەر خۆی نییە و مادەی هۆشبەری بەكارهێناوە.










رووداو