فڕۆكه‌ جه‌نگییه‌كانی هاوپه‌یمانان به‌ سه‌رۆكایه‌تی ئه‌مه‌ریكا له‌ هێرش كردنه‌ سه‌ر تیرۆریستانی داعش له‌ شاری كۆبانێ و ده‌وروبه‌ری به‌رده‌وامن و ئێواره‌ی دوێنێش دوو هێرشى دیكه‌یان كرده‌ سه‌ر داعش له‌ كۆبانێ، هاوكات شه‌ڕى هێزه‌كانى پێشمه‌رگه‌ و یه‌په‌گه‌ له‌گه‌ڵ تیرۆریستانی داعش به‌رده‌وامه‌.

سه‌رچاوه‌یه‌كی پێشمه‌رگه‌ به‌ كوردستان تیڤی رایگه‌یاند كه‌ هێزه‌كانی پێشمه‌رگه‌ و یه‌په‌گه‌ له‌ به‌ری رۆژهه‌ڵاتی كۆبانێ پێشڕه‌وییان كردووه‌ و زیانی زۆریان به‌ تیرۆریستان گه‌یاندووه‌.

هه‌روه‌ها هێزی پێشمه‌رگه‌ به‌ مووشه‌ك و تۆپی قورس مۆڵگه‌ى تیرۆریستانی داعشی له‌ چه‌ند گوندێكی رۆژئاوای شاره‌كه‌ بۆردومان كردو زیانی گیانی و مادییان پێ گه‌یاندن.