ئەندامێكی لیژنەی سامانە سروشتییەكان لە پەرلەمانی كوردستان دەڵێ، لە دانیشتنی ئەمڕۆی پەرلەمانی كوردستان پێشنیازمان كردووە ئەگەر حكومەتی عێراق رازی نەبوو لەسەر هەناردەكردنی بودجەی هەرێم، حكومەتی هەرێمی كوردستان سەربەخۆیی ئابووری رابگەیەنێت.

دڵشاد شەعبان بە تۆڕی میدیایی رووداوی راگەیاند: لیژنەكانی سامانە سروشتییەكان و دارایی بەیەكەوە راپۆرتێكیان ئامادەكردووە، كە ناوەرۆكی راپۆرتەكە پێكهاتووە لە راسپاردە و پێشنیاز بۆ ئەو لیژنەیەی حكومەتی هەرێمی كوردستان، كە بڕیار وایە لە داهاتوودا سەردانی بەغدا بكات.

گوتیشی: لە ناوەرۆكی راپۆرتەكەدا باس لە بودجە و مووچە و ئیمتیازاتەكانی هێزەكانی پێشمەرگەی كوردستان كراوە.


ئەو ئەندامەی پەرلەمانی كوردستان دەڵێت: "لە دانیشتنی ئەمرۆی پەرلەمانی كوردستاندا وەكو لیژنەی سامانە سروشتییەكان راپۆرتێكمان ئامادەكردووە و تێیدا پێشنیازمان كردووە ئەگەر حكومەتی عێراق رازی نەبوو لەسەر هەناردەكردنی بودجەی هەرێم، حكومەتی هەرێمی كوردستان سەربەخۆیی ئابووری رابگەیەنێت".

وابڕیارە ئەمڕۆ پەرلەمانی كوردستان دانیشتنێك ئەنجامبدات و تێیدا لیژنەكانی سامانە سروشتییەكان و دارایی راپۆرتی خۆیان بخوێننەوە و پرسی رۆشتنی ئاشتی هەورامی وەزیری سامانە سروشتیەكان بۆ بەغدا تاوتوێ بكرێت.









رووداو