پنتاگۆن رایدەگەیەنێت كە، ئەمەریكا 3 بنكەی راهێنانی سەربازی بۆ پێشمەرگە لە هەرێمی كوردستان و 9 بنكەیش بۆ سوپای عێراق دەكاتەوە. هاوكات نیویۆرك تایمز، ژمارەی هەر لیوایەكی بۆ مەشق و راهێنان، دیاری كردووە كە، 8 تا 12 هەزار سەرباز لەخۆ دەگرێت. لە هەرێمی كوردستانیشەوە، پسپۆڕی ئاساییش و بەرگری (شوان محەممەد تەها)، وردەكاری دەربارەی پێویستیی سوپای عێراق و پێشمەرگە بە مەشق و راهێنان، رادەگەیەنێت.

زیاتركردنی ژمارەی پێشمەرگە
لەگەڵ پەلاماری تیرۆریستانی داعش بۆ عێراق و ناوچە كوردستانییەكانی دەرەوەی ئیدارەی هەرێم، سەرۆكی ویلایەتە یەكگرتووەكانی ئەمەریكا، (باراك ئۆباما)، هاوپەیمانەتیی نێودەوڵەتیی بۆ رووبەڕوونەوەی تیرۆریستانی داعش پێك هێنا و، هێزی پێشمەرگەی كوردستانیش لە چوارچێوەی ئەو هاوپەیمانەتییە، لە جەنگی دژ بە تیرۆریستانی داعش، بەردەوامە. یەكێك لەو پرسانەی كە لەنێو شەقامی ئەمەریكا ورووژێنرا، پڕچەككردنی پێشمەرگە بوو، لە دەسپێكی ورووژاندنی پرسی پڕچەككردنی پێشمەرگەیش، رۆژنامەی واشنتن پۆست و (abcnews)، بە هاوبەشی راپرسییەكیان لەبارەی پڕچەككردنی پێشمەرگە، لەنێو هاووڵاتیانی ئەمەریكا ساز كرد و، لە راپرسییەكەدا 58%ـی هاووڵاتیانی ئەمەریكا، لەگەڵ پرچەككردنی پێشمەرگە بوون. دوێنێیش، بە فەرمی پنتاگۆن رایگەیاند كە، ئەمەریكا بنكەی مەشق و راهێنان لە هەرێمی كوردستان، دەكاتەوە.
گوتەبێژی پنتاگۆن، (جۆن كێربی)، بۆ cnn، كردنەوەی 3 بنكەی سەربازی ئەمەریكایی بۆ راهێنانی پێشمەرگە لە هەرێمی كوردستان و، 9 بنكەیش بۆ سوپای عێراق، راگەیاند. بەپێی زانیاریی نیویۆرك تایمزیش، كە هەواڵی كردنەوەی 3 بنكەی مەشق و راهێنانی ئەمەریكایی بۆ هەرێمی كوردستان پشتڕاست كردووەتەوە، زانیاریی دركاندووە كە بۆ هەر لیوایەك، 8 تا 12 هەزار پێشمەرگە مەشق و راهێنانیان پێ دەكرێت.
پێوەست كردنەوەی بنكەی مەشق و راهێنانی ئەمەریكا لە عێراق و هەرێمی كوردستان، جێگری سەرۆكی لیژنەی پێشووی ئاساییش و بەرگریی پەرلەمانی عێراق (شوان محەممەد تەها)، بە KDP.info-ی راگەیاند، "ئەمەریكا دەمێك بوو لە هەوڵدا بوو مەشق و راهێنان بە سوپای عێراق بكات، بەڵام سوپای عێراق نەهاتە ژێر باری ئەوەی سوپایەكی پڕۆفیشناڵی هەبێت و دروستی بكات، حكوومەتی عێراق، لە هەوڵی ئەوەدا بوو سوپایەكی میلیشیایی دروست بكات و، خەڵكانی تائیفی بخزێنێتە نێو سوپاوە.

سوپای عێراق زێتر لە 17 فیرقەی سەربازیی هەیە، لە كاتێكدا پێویستی بە 6 فیرقەی سەربازیی پرۆفشناڵ هەیە كە مەشق و راهێنانیان پێ كرابێت. سیاسەت و تێڕوانینی گشتیی ئەمەریكا بۆ سوپای عێراق، مەشق و راهێنان بوو، بەڵام سوپای عێراق بە ئاقارێكی دیدا رۆییشت.
(شوان محەممەد تەها) دەشڵێت، "لە ئێستایشدا ئەگەر سوپای عێراق بە شێوەیەكی گشتی و پێشمەرگە بە شێوەیەكی تایبەتی، بیەوێت لە ڕووی راهێنان و مەشقەوە پرۆفشناڵ، بێت كە مەبەستمان لە راهێنان، راهێنانی سەربازییە و مەشقیش واتە شارەزابوون لە بەكارهێنانی چەكی نوێ، كڕینی چەك تەنیا بەس نییە، سوپای عێراق و پێشمەرگە، پێویستیان بە مەشق و راهێنان هەیە".

ئەم پسپۆڕەی بواری ئاساییش و بەرگری، ئاماژەیشی دا كە، حكوومەتی عێراق تەنیا هەوڵی دەدا چەك بكڕێت بە بێ مەشق و راهێنان لەسەر چەكی نوێ، بۆیە ئێستا عێراق لە بەردەم شەڕێكی دەستەویەخەدایە، جاران حكوومەتی عێراق پێشمەرگەی لە راهێنان و مەشق و بوارەكانی دی پەراوێز خستبوو، بەڵام ئێستا ئەو حاڵەتە بەسەر چوو، ئێستا سوپای عێراق و پێشمەرگەی هەرێمی كوردستانیش پێویستیان بە راهێنان و مەشق هەیە، پێویستە پێشمەرگەیش زێتر رێك بخرێت و مەشق و راهێنانی پێ بكرێت.

(تەها) روونی كردەوە كە، "ئەوەی پێشمەرگەی لە سوپای عێراق جیا دەكردەوە، بیروباوەڕ بوو. هێزی پێشمەرگەیش زێتر پێویستی بە مەشق و راهێنان هەیە، دواتر پێویستی بەوە هەیە رێگەچارەیەك بدۆزرێتەوە بۆ زێتركردنی هێزی پێشمەرگە، رێگەچارەكەیش بە كردنەوەی دەرگەی خۆبەخشی بێت، یان كردنەوەی دەرگەی دامەزراندن بۆ چوونەڕیزی پێشمەرگەوە."

(ئۆباما) بڕیاری دا
سەرۆكی ویلایەتەیەكگرتووەكانی ئەمەریكا (باراك ئۆباما)، دوێنێ لە ژێر گوشاری كۆمارییەكاندا بڕیاری دا كە، 1500 سەربازی ئەمەریكایی رەوانەی هەولێر و بەغدا بكرێن. بەشێكی ئەو سەربازانە، لە هەولێر نیشتەجێ دەكرێن و ژمارەی سەربازانی ئەمەریكایش لە عێراق و هەرێم، دەچێتە سەرووی 3 هەزار سەربازەوە. ئەم بڕیارەی (سەرۆك ئۆباما)، دوای ئەوە دێت كە، لە ماوەی رابردوودا پارتییەكەی لە هەڵبژاردنی ئەنجوومەنی نوێنەران و ئەنجوومەنی پیران، لە بەرامبەر پارتیی كۆماریدا، شكستی برد.

پێشمەرگە شاییستەی پڕچەككردنە
لە ئێستادا، كۆمارییەكان كەوتوونەتە رەخنەگرتن لە (باراك ئۆبا) و لە دیارترین رەخنەكاندا، پرسی پڕچەككردنی پێشمەرگە، بەلای كۆمارییەكانەوە جێگەی بایەخە. ئەندامی ئەنجوومەنی پیرانی ئەمەریكا لە لیستی كۆمارییەكان (تید كروز)، لە چەندین لێدوانی بۆ كەناڵەكانی راگەیاندن، رەخنەی لە (ئۆباما) گرتووە كە، هێزی پێشمەرگە هاوپەیمانی ئەمەریكاییە و لە بەرەنگاربوونەوەی داعش چالاكە، بەڵام پێویستە پڕچەك بكرێت، كە تا ئێستایش ئیدارەی (ئۆباما) وەك پێویست چەكی بە پێشمەرگە، نەداوە.
لەلای خۆیشییەوە باڵیۆزی پێشووی ئەمەریكا لە عێراق (زەڵمای خەلیلزاد)، داوای لە وڵاتەكەی كردووە كە پێویستە پێشمەرگە پڕچەك بكرێت و، لە میانەی دیمانەیەكی لەگەڵ cnn، پێشمەرگەی لە رووبەڕووبوونەوەی تیرۆریستانی داعش، بە شایستەی پڕچەككردن زانیوە.

هاوكات پارتیی كۆماری، رەخنەیەكی دی لە (ئۆباما) دەگرێت، كە خاون بۆ لە نێوبردنی تیرۆریستانی داعش و ستراتیژیەتێكی روونی نییە. بۆ ئەم مەبەستە (ئۆباما) داوای لە كۆنگرێسی وڵاتەكەی كردووە كە، پێویستی بە 1.6 ملیار دۆلار هەیە، بۆ پێكهێنانی سندوقی راهێنانی هێزی پێشمەرگە و سوپای عێراق، تا لە وەدەرنانی تیرۆریستانی داعش، سەركەوتوو بن.
ئەندامی لیژنەی كاروباری دەرەوەی ئەنجوومەنی نوێنەرانی ئەمەریكا، (ئید رویس)، لە دیمانەیەكی بۆ كەناڵی cnn لە سەرەتای مانگی 8-ی 2014، رایگەیاند كە، پێویستە ئەمەریكا بۆ رووبەڕووبوونەوەی تیرۆریستانی داعش، پێشمەرگە پڕچەك بكات. لەلای خۆیەوە ئەندامی كۆنگرێسی ئەمەریكا لە لیژنەی كاروباری چەك (جۆن مەكین)، رایدەگەیەنێت، پێویستە ئەمەریكا هێزی پێشمەرگە پڕچەك بكات، چونكە پێشمەرگە چەكی كۆنی ڕووسیایی پێیە، لە كاتێكدا داعش، بە چەكی ئەمەریكا شەڕ دەكات.

پاشخان
كۆنگرێسی ئەمەریكا، باڵاترین دامەزراوەی دەستوورییە و گوزارشتە لە دەستەی یاسادانانی ئەمەریكا كە لە هەردوو ئەنجوومەنی پیران و ئەنجوومەمی نوێنەران، پێك دێت.
ئەنجوومەنی پیران (senate)، سەرۆكی ئەنجوومەن (جۆو بایدن)ـە، ئێستا كە جێگری سەرۆكی ویلایەتە یەكگرتووەكانی ئەمەریكایە، (پاترك لیهی) بە شێوەی كاتی سەرۆكی ئەنجوومەنی پیرانە، هاوكات ئەنجوومەنەكە 100 سیناتۆری هەیە.
(House of Representatives) ئەنجوومەنی نوێنەران، (جان بێنەر) سەرۆكی ئەنجوومەنە و 435 ئەندامی ئەنجوومەنی نوێنەران هەن. بۆ هەڵبژاردنی كۆنگرێس، 535 سیناتۆر و ئەندام، كۆنگرێس هەڵدەبژێرێت.

لە دواهەڵبژاردنی ئەمجارەی ئەنجوومەنی پیران و نوێنەران، كۆمارییەكان براوە بوون، بۆیە لەمەودا كۆنگرێس دەكەوێتە دەستی كۆمارییەكانەوە.