لە دانیشتینی دوێنێی پەرلەمانی کوردستاندا بە کۆی دەنگی پەرلەمانتاران، دەستەڵات درا بە سەرۆکی ھەرێمی کوردستان وەک فەرماندەی گشتیی ھێزەکانی پێشمەرگە، فەرمان بۆ ڕەوانەکردنی ھێز بۆ کۆبانی دەر بکات, به‌مه‌به‌ستی پاڵپشتی ئه‌و هێزه‌ی ئێستا له‌كوبانێ له‌گه‌ڵ داعش له‌جه‌نگه‌.





ده‌قی بڕیاره‌كه:



بڕیاری ژمارە(٢٨)ی ساڵی ٢٠١٤

پاڵپشت بە حوکمی بڕگە ی(یەک) لە مادەی(٥٦)ی یاسای هەڵبژاردنی پەرلەمانی کوردستان، ژمارە (١)ی ساڵی ١٩٩٢ هەموارکراو، لەسەر داوای سەرۆکی هەرێمی کوردستان و بە پێی بڕگەی یانزدەیەم لە مادەی(١٠)ی یاسای سەرۆکایەتی هەرێمی کوردستان، ژمارە(١)ی ساڵی ٢٠٠٥ هەموارکراو، پەرلەمانی کوردستان لە دانیشتنی ژمارە (٧)ی ڕۆژی ٢٢-١٠-٢٠١٤ ئەم بڕیارەی دا:

یەکەم:ڕەزامەندی دەربڕین لەسەر ناردنی هێزی پێشمەرگەی هەرێمی کوردستان بۆ بەرگری لە کۆبانێ.

دووەم: لەسەر وەزارەتی کاروباری پێشمەرگە و لایەن پەیوەندارەکان پێویستە، حوکمەکانی ئەم بڕیارە جێبەجێ بکەن.

سێیەم: ئەم بڕیارە لە ڕۆژی دەرچوونییەوە لە ٢٢-١٠-٢٠١٤ جێ بەجێ دەکرێت و لە ڕۆژنامەی فەرمی (وەقایعی کوردستان)بڵاودەکرێتەوە.



هۆیەکانی دەرچواندن

لەسەر داوای سەرۆکی هەرێمی کوردستان و بە پێی بڕگەی (یازدەیەم) ی مادەی (دەیەم) لەیاسای سەرۆکایەتی هەرێمی کوردستان ژمارە(١)ساڵی (٢٠٠٥) هەموارکراو، بەپێی ئەو دەسەڵاتەی پێی دراوە بۆ جوڵاندنی هێزی پێشمەرگە بۆ دەرەوەی هەرێمی کوردستان بەڕەزامەندی پەرلەمانی کوردستان و بە مەبەستی پاراستنی ئاسایشی نیشتمانی لە مەترسییەکانی تیرۆر بەتایبەت کردەکانی ڕێکخراوی تیرۆرستی داعش و بەو پێیەی عێراق و هەرێمی کوردستان بەشێکن لە هاوپەیمانی نێودەوڵەتی بۆ بەرەنگاری تیرۆر، وەک بەشێک لە پێداویستییەکانی بڕیاری پەرلەمانی کوردستان ژمارە (٢٤) لە ١٥-١٠-٢٠١٤ ئەم بڕیارە دەرچوێنرا.





یوسف محەمەد سادق

سەرۆکی پەرلەمانی کوردستان

٢٢-١٠-٢٠١٤