درەنگانی شەوی رابردوو، هێزەكانی پێشمەرگە لە نزیك بەنداوی مووسڵ توانییان هێرشێكی تیرۆریستانی داعش تێك بشكینن و بە توندی وەڵامیان بدەنەوە.

كارگێری لقی 14-ی پارتیی دیموكراتی كوردستان و سەرپەرشتیاری بەنداوی مووسڵ (شێخ محێدین مزووری)، بە KDP.INFO-ی ڕاگەیاند، درەنگانی شەوی رابردوو تیرۆریستانی داعش لە دووریی كیلۆمەتر و نیوێك لە بەنداوی مووسڵ، هێرشیان كردە سەر هێزەكانی پێشمەرگە، بەڵام هەر زوو هێزەكانی پێشمەرگە بە توندی وەڵامیان دانەوە و توانییان ئەو هێرشەی داعش شكست پێ بێنن.
(مزووری) هەروەها گوتیشی، راستەوخۆ دوای ئەو هێرشە، هێزەكانی پێشمەرگە بۆردوومانی مولگەی تیرۆریستانی داعشیان بە تۆپ و چەكی قورس لە نزیك ئەو سنوورە و دەوروبەری ناحیەی وانكێ، كرد.
ئەو سەرپەرشتیارەی بەنداوی مووسڵ زیاتر ڕوونی كردەوە، "هەرچەند تاكو ئێستا زانیاریمان لە سەر كوژراو و برینداری تیرۆریستانی داعش نییە، بەڵام خۆشبەختانە هێزەكانی پێشمەرگە لەو هێرشەی چەكدارانی تیرۆریستی داعشدا هیچ زیانێكیان نەبووە".
دەربارەی بەنداوی مووسڵیش، (شێخ محێدین) گوتی، هیچ مەترسییەكی تیرۆریستانی داعش لەسەر بەنداوی مووسڵ نییە و بۆ پاراستنی ئەو بەنداوەیش، هێزەكانی پێشمەرگە لە ئامادەباشیی تەواودان و وەڵامی هەر هێرش و پەلامارێك دەدەنەوە كە لەسەر بەنداوی مووسڵ هەبێت.