دوای ئەوەی رەبیعە ئازادکرد کرا، وەزارەتی پێشمەرگە ئاشکرای دەکات پلانی ئازادکردنی شەنگالیش و ناوچەکانی دیکەی ژێر دەستی داعش ئامادەکراوە.



ھەڵگورد مەلا حیکمەت بەڕێوەبەری گشتی راگەیاندن و رۆشنبیری و پەیوەندییەکانی وەزارەتی پێشمەرگە رایگەیاند: وەزارەتی پێشمەرگە بە ھەماھەنگی لەگەڵ ئەمریکا و ھاوپەیمانان پلانی ئازادکردنی شەنگالی ئامادەکردوە و چاوەروانی فەرمانین.

ھەڵگورد مەلا حیکمەت، بۆ ئاشکرا نەبوونی پلانی سەربازی وردەکاری پلانی ئازادکردنی شەنگالی نەخستەروو، بەڵام گوتی: پلانەکە بۆ ئازادکردنی شەنگاڵ و ئەو جێگایانەی تریش ئامادەیە کە داعش داگیری کردوون.

بەپێی زانیاریەکان ھێزەکانی پێشمەرگە حەوت کیلۆمەتر لە چیای شەنگال دوورن و لە تەواوی ئامادە باشیدان و چاوەروانی فەرمانی ھێرشبردنن بۆ ئازادکردنی شەنگال.

دوای ئازادکردنی رەبیعە و ھەندێک ناوچەی تر، پلانی پێشمەرگە بۆ ئازادکردن و پاککردنەوەی شنگال دەستی پێکردووە و چەند رۆژێکە بە چری بۆردوومانی ھێزەکانی داعش لەو ناوچانە دەکرێت.

شەنگال دە‌کە‌وێتە ئە‌وپە‌ڕی خۆرئاوای ھەرێمی کوردستان و ١٢٠ کیلۆمەتر لە شاری موسڵە‌وە دوورە و ماوەی ٢ مانگە ھێزەکانی داعش داگیریانکردوە.
دوێنێ چوارشەمە، لیوا موسا گەردی، فەرماندەی فەرماندەیی ھەڵگورد ڕایگەیاند بەڵێن بە خەڵکی کوردستان دەدەن مزگێنی ئازادکردنی شنگال و زوممار نزیک بووەتەوە.