لە دیدارێكی تایبەتدا بۆ گۆڤاری گوڵان ئەسیل نجێفی پارێزگاری نەینەوا بۆ گوتى: ئێمە لە ئێستادا سەرقاڵی پێكهێنانی هێزێكین لە پۆلیس و پاسەوانی نیشتمانی بۆ هاوكاریكردنی پرۆسەی ئازادكردنی شاری موسڵ، دیارە دوای تەواوكردنی رێوشوێن و پێداویستییەكانی پێكهێنانی ئەو هێزە، ئەو توانایەی دەبێت كە بەشداریی لەو پرۆسەیەدا بكات.

هەروەها ئەسیل گوتی: لە راستیدا چاكتر وایە لە خەڵكی شارەكە بن، هەروەها هێزی دیكەش هەبێت بۆ هاوكاریكردنی ئەم هێزە و ئەنجامدانی پرۆسەكە، بێگومان پێویستمان بە هێزی دیكەی گەورەی وەك ئەمریكا و گورزی ئاسمانی هەیە، بۆ دابڕانی كۆمەك و یارمەتیی دارایی لە داعش، بەڵام بڵاوەپێكردنی هێزی جیاواز لە سەر زەوی رەنگە داعش سوودی لێوەربگرێت و كێشەو ململانێ لە نێوانیاندا بێنێتەئاراوە.

شایانی باسە ئەسیل نوجێفی گوتی: لە راستیدا داعش زۆربەی یارمەتییەكانیان لە سووریاوە بۆ دێت، ئەو هێزەی داعش كە لە ناو موسڵدایە زۆر سنووردارە و تەنیا لایەنی تەقەمەنی نەبێت، بەڵام یارمەتییەكانی دیكەیان لە دەرەوە پێدەگات.

لە درێژەی دیدارەكەیدا نوجێفی گوتی: له موصل رەوشی گوزەران و ئابووریی خەڵكەكە لەو پەڕی خراپیدایە، خزمەتگوزارییەكان زۆر كەمن، یان هەر نین، نرخی یەك بوتڵ غاز گەیشتۆتە 40تا 50 هەزار دینار، خزمەتگوزاریی كارەبا و نەخۆشخانە و شارەوانی زۆر كەمە.

لە كۆتاییدا نوجێفی گوتی: ژمارەیان نزیكەی یەك ملیۆن و پێنج سەد هەزار كەس دەبێت، پێش رووداوەكانیش ژمارەیان لە دەوری یەك ملیۆن و 700 هەزار كەس دەبوو.

بۆ خوێندنەوەی ئەم بابەتە لە گۆڤاری گوڵان ژمارە(995)