ئەنجوومەنی وەزیرانی عێراق پێش جەژنی قوربان کۆ دەبێتەوە و تێدا پرسی رەوانەکردنی مووچەی فەرمانبەرانی ھەرێم گفتوگۆ دەکات و ھەر ئەمڕۆیش، بڕیارە شاندێکی حکوومەتی ھەرێمی کوردستان بۆ چاوپێکەوتن لەگەڵ سەرۆکوەزیرانی عێراق لەبارەی تەواوکردنی گفتوگۆکانی کابینەی نوێی حکوومەتی عێراق و کێشە ھەڵپەسێردراوەکانی نێوان ھەردوو لا سەردانی بەغدا بکات.
رۆژنامەی سەباح لە زاری بەرێوبەری نووسینگەی سەرۆکوەزیرانی عێراق (مەھدی عەلاق) بڵاوی کردووەتەوە، ئەمڕۆ یاخود سبەی، ئەنجوومەنی وەزیران کۆبوونەوەیەکی نائاسایی ئەنجام دەدات بۆ گفتوگۆکردن لەبارەی بودجە و مووچەی فەرمانبەرانی ھەرێمی کوردستان و ئەو کۆبوونەوەیە پێش جەژنی قوربان دەبێت.
لای خۆشیەوە ئەندامی خولی پێشووی پەرلەمانی عێراق لەسەر لیستی ھاوپەیمانیی کوردستانی (د.مەحموود عوسمان) گوتی، ئەمڕۆ شاندی کوردی دەچێتە بەغدا بۆ کۆبوونەوەیە لەگەڵ (حەیدەر عەبادی) لەبارەی پرسە ھەڵپەسێردراوەکانی نێوان ھەردوو لایە.