لە گردبوونەوەیەک لە بەردەم پارکی شانەدەر لە شاری هەولێر، رێكخراوەكانی كۆمەڵگەی مەدەنی داوایان لە كۆمەڵگەی نێودەوڵەتی كرد بە هانای خەڵکی کۆبانێوە بچن و لە چنگی تووندڕەوەکان ڕزگاریان بکەن.



لە بەیاننامەی کۆتایی گردبوونەوەکە دا ڕێکخراوەکانی كۆمەڵگەی مەدەنی ئاماژەیان بەوەکرد، لە كاتێكدا كە هێشتا برینەكانی شنگال و زوممارو برا كریستیانەكان لە باشووری كوردستان و لە دەرەوەی ئیدارەی هەرێمی كوردستان خوێنیان لێ دەچۆڕێ چەکدارە تووندڕەوەکان خەریک کوبانێ بە تەواوی وێران بکەن و داوایان لە کۆمەڵگەی نێودەوڵەتی کرد لە هەمبەر ئەو کارەساتەی لە ڕۆژئاوای کوردستان ڕوو دەدات بێدەنگ نەبێت و هاریكاری كۆبانێ بكەن و نەهێڵن بەهیچ شێوەیەك ئەوەی لە شنگال روویدا، لە كۆبانێ دووبارە ببێتەوە.



لە خۆپیشاندانەکە چەندین دروشم بەرزكرانەوە كە ئاماژە بوون بۆ زیندویەتی گیانی نەتەوەیی لە نێوان پارچەكانی كوردستان و هەستكردن بە ئازارەكانی یەكتری.