لەكاتێكدا كۆمەڵگەی نێودەوڵەتی سەرقاڵی ئامادەكارییە بۆ رووبەڕووبوونەوەو لەناوبردنی چەكدارانی سەر بە رێكخراوی دەوڵەتی ئیسلامی (ناسراو بە داعش)، بەپێی راپۆرتە ئەمنییەكان رێكخراوی داعش لەرێگەی فرۆشتنی نەوت و كۆكردنەوەی باج لەو ناوچانەی لە عێراق و سووریا كۆنتڕۆڵیكردوون رۆژانە شەش ملیۆن دۆلار كۆدەكاتەوە.

مەسرور بارزانی، راوێژكاری ئەنجوومەنی ئاسایشی نەتەوەیی هەرێمی كوردستان لە هەڤپەیڤینێكدا لەگەڵ كەناڵی حوڕە گوتی: "رێكخراوی داعش چەكێكی زۆری لەبەردەستدایە كە لەمیانی رووبەڕووبوونەوەكانی لەگەڵ سوپای ئازادی سووریاو سوپای عێراق دەستی بەسەرداگرتوون".

گوتیشی: "پێموایە لەگەڵ ئەو هەموو چەكە پێشكەوتووانەی لە سووریاو عێراق دەستی بەسەرداگرتوون هێشتاش لایەنەكان هێزی رێكخراوی داعش بەكەم سەیردەكەن، لەكاتێكدا لە عێراق و سووریا خاوەنی نزیكەی 40 هەزار چەكدارە، لەوانەشە بەیەكسانی بەسەر هەردوو دەوڵەت دابەش بووبن".

دەشڵێت: "تاوەكو ئێستاش رێكخراوی دەوڵەتی ئیسلامی بەردەوامە لە كۆكردنەوەی داهات، لە رێگەی فرۆشتنی نەوت و گەنم و وەرگرتنی باج رۆژانە شەش ملیۆن دۆلار كۆدەكاتەوە، بێجگە لەو هاوكاریانەی بەدەستیان دەگات".









رووداو