زۆر شت دەربارەی كابینەی تازەی حكومەتی عیراق دەگوترێت بەوەی كە كەسایەتی زۆر هاتوونەتە ناو ئەم كابینەكەوە كە رەنگە نیشانەی پرسیاریان لەسەربێت، بەڵام سەرباری ئەمە گەشبینی لە ئارادایە كە بەوەی كە دەتوانێت بەپیر داخوازی و كێشەكانی خەڵكەوە بێت، كازم شممەری ئەندامی ئەنجومەنی نوێنەرانی عیراق لە لێدوانێكی تایبەت بۆ گوڵان دەڵێ:

من پێموایە حكومەتی تازەی عیراق لەسەر هەردوو ئاستی ناوخۆو دەرەوەدا كاراتر دەبێت و داخوازییەكانی كۆمەڵگەی نێودەوڵەتی بەدی دێنێت. بەڵێ، ئەو دامەزراوەیەی كە مالیكی بەرهەم هێناوە، هەمان دامەزراوەیە كە عەبادی بەرهەم هێناوە، بەڵام خاڵە گرنگەكە لەوەدایە مالیكی لە بارودۆخێكی سروشتی هاتۆتە ئاراوە، كە بە ویستی هاوپەیمانیی نیشتمانی بووە، واتا بەستنەوەی سیاسەتی ناوخۆو دەرەوە بە ئیرادەی مالیكی و هاوپەیمانییەتییەكەی بووە، بەڵام ئەمڕۆ عەبادی بەو ئیرادەیە نەهاتووە بەڵكو بە پشتگیریی كۆمەڵگەی نێودەوڵەتی بووە، بۆیە من بە تەواوی لەگەڵ ئەو بۆچوونەم، حكومەتێك لە شەش مانگی سەرەتادا نەتوانێت بەرنامەیك دابنێت بۆ بنیادنان و ئاوەدانكردنەوە دابین كردنی مافەكانی مرۆڤ و سیما و ئاكارەكانی حكومەتی چوار ساڵەی نەبێت كە وڵات بەڕێوە ببات، هەڵبەتە شكست دێنێت،
بە تایبەتیش كە بەرامبەر تیرۆریستانی داعش وەستاوە، كە ئەوەندە لە بەغداوە دوور نییە، چونكە داعش لەلایەن چەند وڵاتێكەوە پشتیوانیی لێ دەكرێت كە هەرگیز خێرو خۆشییان بۆ عیراق ناوێت، بۆیە ئەو شەش مانگە ماوەیەكی چارەنووسسازە بۆ حكومەتی عەبادی تا بیسەلمێنێت كە دەتوانێت نموونەیەكی جیاوازتر لە حكومەتەكەی پێشتر پێشكەش بكات.