تورکیا ئەمڕۆ شەممە دەڵێ، دوێنێ هەینی 45هەزار ئاوارەی ڕۆژئاوای کوردستان چوونەتە نێو خاکی تورکیاوە، کە بە هۆی هەڕەشەکانی ڕێکخراوی داعشەوە ناوچەکانی خۆیانیان جێ هێشتووە.
جێگری سەرۆکوەزیرانی تورکیا(نەعمان قورتولموش)، بە سی ئێن ئێن تورکی ڕاگەیاندووە، "نزیکەی 45هەزار کوردی ڕۆژئاوای کوردستان لە سنوور بەرەو تورکیا پەڕونەتەوە و تا ئێستا لە بە درێژایی 30کم و لە 8 خاڵەوە داخیلی تورکیا بوون."
کوردانی ڕۆژئاوا بە هۆی ئەو هێرشەی بۆ سەریان بەرپا کراوە، داوای هاوکارییان لە لایەنە کوردستانییەکان و هاوکات کۆمەڵگەی نێودەوڵەتی کرد، بۆ بەرگرتن بە ئەگەری کۆمەڵکوژیی هاوولاتیانی کۆبانی، بە هانایانەوە و پشتیوانییان لێ بکەن.
لە بەرانبەردا، دوێنی هەینی، سەرۆکی هەرێمی کوردستان(مەسعوود بارزانی) داوای لە هەموو لایەنە كوردستانییەكان کرد هەموو ناكۆكییەكانیان وەلا بنێن و بەیەكەوە بەرگری له كەرامەت و خاك و ژیانی هاووڵاتیانی كۆبانێ بكەن. سەرۆکی هەرێمی کوردستان هاوکات گوتی، بەرگریكردن لە خاك و خەڵكی كوردستان ئەركێكە لەسەر شانی هەموومانە و لەسەرووی هەموو ئەركێكی دیكەیە.
(سەرۆک بارزانی) هاوکات داوای لە كۆمەڵگەی نێودەوڵەتییش کرد بە زووترین كات هەموو ڕێوشوێنێك بگرنەبەر بۆ پاراستنی كۆبانی و خەڵكی ڕۆژئاوای كوردستان لە دەستی تیرۆریستان.