شاندی دانوستاندنکاری کورد لە دوای کۆبوونەوەکەی دوێنێیان لەگەڵ سەرکردایەتی لایەنە سیاسییەکانی هەرێمی کوردستان درەنگانێکی شەو گەڕانەوە بەغدا.

زانا رۆستایی، ئەندامی شاندەکە بە تۆڕی میدیایی رووداوی راگەیاند: "لە دوای کۆبوونەوەکە و درەنگانێکی شەو بەڕێکەوتین بەرەو بەغدا بۆ ئەوەی هەندێک شت لە نێوان ئێمە و ئیئتیلافی شیعە بۆ پێکهێنانی حکومەت گفتوگۆیان لەسەر بکەین".

رۆژی رابردوو سەرکردایەتی سیاسی کورد لە گردی زەرگەتەی شاری سلێمانی و لە مەکۆی سەرەکی بزووتنەوەی گۆڕان بۆ ماوەی زیاتر لە 6 کاژێر کۆبوونەوە و لە ئەنجامدا بڕیاریاندا بەشداری حکومەتی عێراق و کابینەی عەبادی بکەن، بە مەرجێک لەماوەی 3 مانگدا داواکارییەکانی کورد بچێتە بواری جێبەجێکردن.

ئەو وەزارەتانەی کە بەر کورد کەوتوون بریتین لە "وەزارەتی دارایی، رۆشنبیری، گەشتوگوزار، کۆچ و کۆچبەران و جێگری سەرۆکوەزیرانی عێراق، بەڵام تاوەکو ئێستا لایەنە سیاسییەکانی هەرێمی کوردستان ناوی وەزیرەکانیان بۆ ئەو پۆستانە یەکلایی نەکردووەتەوە".






رووداو