عالمی ڕووحی كاكەیی ڕایگەیاند؛ "ئەو كەسانەی دەڵێن كاكەیی ئیسلام نیە ڕاست نیە و ئێمە ئیسلامین."



ڕەحیم عەزیم، عالمی ڕووحی كاكەیی لە كۆنگرەیەكی ڕۆژنامەوانی لە بارەگای یەكێتی زانایانی ئایینی لە كەركووك ڕایگەیاند؛ ئێمە وەكو هەڵبژاردەیەكی كاكەیی موسوڵمان، هاتووین جەخت لەوە دەکەینەوە ئیسلامین و بەدرێژایی مێژوو لە سەر ڕێبازی ئایینی ئیسلام و ڕێبازی پێغەمبەر محەمەد (د.خ) کە خاتمی پێغەمبەرانە و لە قۆئانی پیرۆزدا هاتووە، ئەژین و ئەمرین.



عالمی ڕووحی كاكەیی ئاماژەی بەوە كرد، " لەم ماوەیەدا هەندێك دەنگۆی ئەوە هەیە كە گوایە كاكەیی ئیسلام نییە و ئایینی تایبەت بە خۆیان هەیە كە لە ڕێگەی دەستگاكانی ڕاگەیاندنەوە لەو جۆرە قسانە دەكەن، بۆیە ئەوانە هەمووی دوورن لە ڕاستییەوە و ئەوەی ئەم دەنگۆیانە بڵاو دەکەنەوە كۆمەڵێكن لە كەسانی بێ بنەما كە لە دەرەوەی ووڵات هاندەدەرێن و هیچ بیروباوەڕێكی ڕووحییان نییە، بەڵكو بەدوای پلەو و پایەدا دەگەڕێن .



ڕەحیم عەزیم گووتی: هەموو دەزانین ئێمە نەوەی شیخ ئیسحاق كوڕی شێخ عیسای بەرزنجین و موریدی ئەوین، ئەوەش ڕەگ و ڕیشەی بنەماڵە پیرۆزەكەمانە كە بەدرێژایی مێژوو هاتووە كە لە سەید و شیخ و زاناكان پێكهاتووە و ڕەگ و ڕیشەی كاكەییەكان لەلایەن زاناكان و بەهرەمەندی مەزهەبە ئیسلامیەكانەوە نووسراوەتەوە و لە پەرتووكە مێژوویەكانی ئیسلامەوە پەسەند كراوە.



عالمی ڕووحی كاكەیی لە بەشێكی دیكەی كونگرەكە رۆژنامەوانییەکە دا ڕایگەیاند؛ " دابونەریتیشمان وەكو سونەتكردن و شایی و بۆنە و جەژنەكانمان و تەنانەت ناوەكانیشمان لە سەر پەیڕەوی ئایینی پیرۆزی ئیسلامە و ئەوەش بەڵگەی ئیسلام بوونمانە و ڕۆڵەكانمان لە قوتابخانەكان قۆرئانی پیرۆز دەخوێنن. دوای ئەو هەموو شتە، ئێمە چۆن موسۆڵمان نین؟ بۆیە ئێمە بەوانە دەڵێن ئێوە لارین، وەرنە هۆشی خۆتان و ڕێگەی ڕاست بگرن كە ڕێگەی ئایینی پیرۆزی ئیسلامە و ئەو كارانەتان هیچ دادتان نادات .



ڕەحیم عەزیم داوای لە دامودەزگاكانی ڕاگەیاندن کرد، ڕێگە بەو كەسانە نەدەن كە خۆیان كردووەتە نوێنەری عەشیرەتی كاكەیی و بەناوی ئێمەوە لێدوان دەدەن كە هیچ بنەمایەكی ڕاستی نییە و داوای لە وەزارەتی ئەوقاف و حكومەتی هەرێمی كوردستان کرد سنورێك بۆ ئەو حاڵەتە دابنێن.