لە شارەدێی جەلەولا چەكدارانی داعش خانووی سەرۆك هۆزی كروی و چەند كەسێكی نزیك لەو سەرۆك هۆزە دەتەقێننەوە و بە وتەی سەرچاوەیەكیش هۆكارەكەی ئەوەیە ئەو هۆزە و داعش ناكۆكی كەوتۆتە نێوانیانەوە.



هۆزی كروی یەكێكن لە هۆزە عەرەبە توندرەوە دیارەكانی سنووری جەلەولا و لە سەردەمی رژێمی بەعسی روخاودا رۆڵ و پێگە و پلە و پایەی بەرزیان لە ناو ئەو حیزبە و حكوومەتیشدا هەبوو و دوای روخانی رژێمی بەعسیش، بە هەمان شێوە لە ناو حكومەتی نوێی عێراق لە سنوورەكەدا بوونە خاوەن پۆست و هەرزوو كەوتنە وێزەی هاووڵاتیانی كورد لە ناوچەكەدا و دەستێكی باڵایان لە تیرۆركردنی هاووڵاتیان كورد و دەركردنی خێزانە كوردەكان لە سنوورەكە هەبوو. لە گەڵ هاتنی چەكدارانی داعشیش گەنجەكانی ئەم هۆزە چوونە ریزی چەكدارەكانەوە و دژی پێشمەرگە شەڕیان كرد.



لەبارەی دوایین زانیارییەكانیشەوە، سەرچاوەیەك لە هێزەكانی پێشمەرگەی كوردستان لە سنووری جەلەولا بە ئاژانسی هەواڵی پەیامنێری راگەیاند: دوێنێ‌، چەكدارانی داعش خانووی سەرۆك هۆزی كروی "شێخ فەیسەل ساڵح" و سێ ئامۆزایان لە ناو شارەدێی جەلەولا تەقاندۆتەوە و هۆكارەكەشی دەگەرێتەوە بۆ ئەوەی لە ئێستادا ناكۆكی كەوتۆتە نێوانیانەوە و سەرۆك هۆزەكەش بەرەو شاری باقووبە هەڵهاتووە.



سەرچاوەكە وتیشی، هەر بە پێی زانیارییەكان ئەو سەرۆك هۆزە لە گەڵ حكوومەتی عێراق لە پەیوەندیدایە بۆ پێكهێنانی فەوجێكی تەواری لە سنوورەكەدا.