لیژنەی باڵای بە جینۆساید ناساندنی ئێزدییەكان، بڕیاریدا لە سەر ئاستی پارێزگای دهۆك لیژنەیەك بۆ كاركردن لە سەر دۆسیەی جینۆسایدی ئێزدییەكان پێك بێت.



فوئاد عوسمان گوتەبێژی وەزارەتی شەهیدان و ئەنفالكراوان گووتی: ا لیژنەی بە جینوساید ناساندنی كوردانی ئێزیدی و پێكهاتە ئایینی و نەتەوەییەكانی تر، بڕیاریدا لێژنەیەكی باڵا لە سەر ئاستی دهۆك بۆ هاوكاری لێژنەی باڵای ناساندنی جینۆسایدی كوردانی ئێزیدی و پێكهاتە ئایینی و نەتەوەكانی تر پێکبێت و كار ئاسانی بۆ جێبەجێ كردنی كارەكانی ئەم بۆردە بكات .



گوتەبێژی وەزارەتی شەهیدان و ئەنفالكراوان باسی لەوەشکرد کە بۆ وەرگرتن و ناردنی بەڵگەنامەکان، لیژنەكەیان بۆ پەیوەندی كردن و وەرگرتنی زانیاری پێکهێناوەو ئیمێڵێكی ئەلیكترۆنی و لاپەڕەیەكی فەرمیان لە تۆڕی كۆمەڵایەتی فەیسبوك كردۆتەوە، تاوەکو ئەو خۆبەخشانەی بەڵگە و تۆمارەكانیان لایە، پەیوەندیان لەگەڵ دەكرێت بۆوەی هاوكاری لێژنەكان بن.



لیژنەی ناساندنی جینوسایدی كوردانی ئیزیدی و پێكهاتە نەتەوەیی و ئاینییەكانی تر، بە بڕیارێكی ئەنجومەنی وەزیران لە رۆژی ١٧/٨/٢٠١٤ بە سەرۆكایەتی مەحمود حاجی صالح وەزیری كاروباری شەهیدان و ئەنفالكراوان و ئەندامییەتی محمد قادر هاودیانی وەزیری كار و كاروباری كۆمەڵایەتی و فەلاح مستەفا بەرپرسی فەرمانگەی پەیوەندییەكانی دەرەوەی حكومەتی هەرێم و ئامانج رەحیم سكرتێری سەرۆكایەتی ئەنجومەنی وەزیران پێك هاتووە و كار لەسەر كۆكردنەوەی بەڵگەنامەو گەیاندنی كەیسەكە بە دادگای باڵای تاوانەكان و بە جینوساید ناساندنی دەكات.