دوای دەستبەسەرداگرتنی مەخموور لەلایەن چەكدارانی داعش و ئاوارەبوونی خەڵكی ئەو قەزایە، وەزارەتی كۆچ و كۆچبەرانی عێراق یارمەتییەكی مادی بۆ تەرخانكردوون و بە گوتەی قایمقامی ئەو قەزایەش، ئەمڕۆ دوایین مۆڵەتە بۆ وەرگرتنی داواكاری هاووڵاتییانی مەخموور.

ئیبراهیم شێخەڵڵا، قایمقامی قەزای مەخموور رایگەیاند، "وەزارەتی كۆچ و كۆچبەرانی حكومەتی عێراق بڕیاریداوە وەك یارمەتییەك بۆ ئەو كەسانەی كە بە هۆی رووداوەكانی ئەم دواییانە لە مەخموور بۆ هەولێر و دەورووبەری ئاوارەبوون، بڕی یەك ملیۆن دینار بە هەر خێزانێك بدات".

قایمقامی قەزای مەخموور، ئەمڕۆ یەكشەممە 17.8.2014ـی بە دوایین مۆڵەت دانا بۆ وەرگرتنی داواكاری هاووڵاتییان و رایگەیاند، "تاوەكو كاژێر 4ـی پاشنیوەڕۆی ئەمڕۆ لە هۆڵی ئۆسكاری شاری هەولێر، داواكاری هاووڵاتییان وەردەگیرێت بۆ پێدانی ئەو یارمەتییە و ئەو شتانەش كە پێویستە، ناسنامەی باری شارستانی،ناسنامەی عێراقی و كارتی زانیاری نیشتەجێبوونە".

ئیبراهیم شێخەڵڵا داوای لەو هاووڵاتییانە كرد، كە پێشتر ماڵیان لە هەولێر بووە، "داواكاری پێشكەش نەكەن لەبەر ئەوەی ئەو یارمەتییە نایانگرێتەوە و لیژنەیەكیش بۆ ئەو مەبەستە پێكهێنراوە، كە لێكۆڵینەوە دەكات بزانێت ئەو كەسانەی داواكارییان پێشكەشكردووە ماڵیان لە مەخموور بووە یان نا، لەبەر ئەوەی ئەو یارمەتییە تەنها بەو خێزانانە دەدرێت كە نیشتەجێی مەخموورن".






رووداو