ئاشكرایە بەمدواییە ناوچە كوردستانیەكان بەتایبەت ناوچەكانی كوردی ئێزیدی نشین و قەزای شەنگال، لە لایەن دەوڵەتی خەلافەتی بەناو ئیسلامی (داعش)ەوە كەوتنە بەر پەلامار دان و خەڵكەكەی بوونە قوربانی دەست ئەو تاوانبارانەی تەنانەت دەستیان لە پیرومنداڵ و ئافرەتیش نەپاراست و وێرای ئەو ژمارە زۆرەی شەهید كران و بوونە قوربانی و دەستبەسەركران، بە سەدان هەزار كەسی دیكەش لە خوشك و برایانی كوردی ئێزیدی ئاوارەی چیا و چۆل و شاروشارۆچكەو ناوچەكانی هەرێمی كوردستان ودەوروری بوون، بەمەش كارەساتێكی مرۆیی لێكەوتەوە، كە ویژدانی هەموو جیهانی هەژاند، بەتایبەتیش دوا پەلاماری وەحشیگەریان بۆ سەر كۆمەڵگەی(كۆچۆ) كە سەدان كەسیان قەتلوعام كردووە و ئەوانی دیكەشیان لە ئافرەت و منداڵ دەستبەسەر كردووە و بۆ شوێنێكی نادیاریان بردوون، تیرۆرستان بەو كردەوە قێێزەون و بێزراوانەیان بە روونی كوردستانی لانەی پێكەوژیان و لێبوردەیی و ئارامیان كردۆتە ئامانج.
ئێمە لەكاتێكدا كە زۆر بەتوندی ئەو تاوانە دەستەجەمعی و نامرۆییانەی دەوڵەتی خەلافەتی بەناو ئیسلامی (داعش) ئیدانەومەحكوم دەكەین و ئەو رەفتارانەیان بەرامبەر بە برایانی كوردی ئێزیدی بە جینۆسایدی لەقەڵەم دەدەین، كە كارەساتێكی گەورەی مرۆیی كەم وێنەیەو پێویست دەكات وڵاتانی بریار بەدەستەكانی جیهان و نەتەوە یەكگرتووەكان و ئەنجوومەنی ئاسایش و رێكخراوەكانی مافی مرۆڤ، پەلەی لێبكەن بۆ رێگرتن لەو تاوانكاریەو بە كۆدەنگیەوە میكانیزمی بەپەلە رێكبخەن بۆ بەهاناهاتنی دانیشتوانی ئەو ناوچانە.
بە هەموو هێزو توانایاكمانەوەش وەك چۆن هەوڵمان داوە زیاتر كاردەكەین چ لەسەر ئاستی ناوخۆ یا دەرەكیەوە بۆ بەهاناهاتنی خوشك و برایانی ئێزیدی و پاڵپشتیكردنیان و رزگاركردنی شارودێهاتەكانیان و گەڕانەوەیان بۆ زێدی رەسەنی خۆیان لە لایەك و لەلایەكیتریشەوە پاراستنی تەواوی خاكی كوردستان كە نمونەی پێشكەوتنی دیموكراسیەت و پێكەوە ژیانی نەتەوەیی و ئاین و ئاینزا جیاجیاكان و یەكترقبوڵكردنە..
پرسەوسەرەخۆشیمان بۆ كەسوكاری قوربانییەكان ..
دروود بۆ گیانی شەهیدان و قوربانیانی ئەو تاوانكارییە نامرۆڤایەتییە..
مەكتەبی سیاسی
پارتی دیموكراتی كوردستان
15/8/2014