ئێوارەی 6ی ئابی 2014 گۆڤاری گوڵان كۆرێكی بۆ رۆمنانووسی عەرەب جومعە حلفی بە بۆنەی چاپی دووەمی رۆمانی رێرەوی پەرەسێلكە ( مسار السنونو) رێكخست، لەم كۆڕەدا كە ژمارەیەكی بەرچاو لە هەڤالانی بارزانی نەمر و سیاسەتمەدار و ئەكادیمیست و رۆشنبیر و رۆژنامەنووس ئامادەبوون، بە تێر و تەسەلی ناوەركی ئەم رۆمانە هەڵسەنگێرا و هەروەها هەوڵی بەرێز جومعە حلفی بەرز هەڵسەنگیرا كە وەك نووسەرێكی عەرەب ئەم شاكارەی لەسەر كاروانە میژووییەكەی بارزانی نەمر و هەڤاڵەكانی لە پەرینەوەیان لە رووباری ئاراس نووسیووە.
هەر لەم كۆڕەدا بەرێز موحسین دزەیی سیاسەتمەدار و نوێنەر و هەڤاڵی بارزانی نەمر وتەیەكی پێشكەشی ئامادەبووان كرد و لەسەرەتای وتەكەیدا زۆر دەستخۆشی لە نووسەری رۆمانەكە كردوو بە ناوی گەلی كوردستانەوە بۆ ئەم شاكارە سوپاسی كرد، پاشان هاتە سەر میژووی ئەو كاروانە پر سەروەرییەوە و هەروەها گێرانەوەی هەندێك لە ووردەكاری كە بەرێزیان لە كوڕ و خێزانی پێشەوا قازی محەمەد سەبارەت بە كۆماری كوردستان لە مهاباد راستەوخۆ بیستوویەتی و هەروەها چەندین بیروەری وورد و گرنگی لە زاری سەبارەت بەو كاروانە مێژووییە گێرایەوە كە بەرێزیان راستەوخۆ لە بارزانی نەمرەوە گوێ بیستی بووبن.
دوای ئەوە بەرێز مامۆستا محەمەدی مەلا قادر سیاسەتمەدار ناسراو و پێشمەرگەی هەردوو شۆرشی ئەیلولی گولان زۆر بە ووردی باسی جوگرافیای ئەو كاروانە میژووییەی بۆ ئامادەبووان كرد و هەروەها جەختی كردوەوە لەسەر شێوازی مقاوەمەتی بارزانی نەمر و هەڤاڵانی لەگەڵ سوپاس 3 دەوڵەتی داگیركەر هەتا گەیشتوونە لیواری رووباری ئاراس و پاشان پەریوونەتەوە و گەیشتوونە یەكێتی سوڤیەتی پێشان.
سەبارەت بە شیوازی هونەری رۆمانەكە و پاراوی زمانی رۆمانەكەش، بەرێز د.رەشاد میران وتەیەكی بەزمانی عەرەبی پێشكەش كردوو و سوپاسی نووسەری رۆمانەكەی كرد كە ئەو ئاستە بەرزە ئەم كاروانە مێژووییەی كردووە بەو رۆمانە گرنگە .
لە كۆتایی ریورەسمەكە بەرێز جومعە حلفی وتەیەكی پێشكەشی ئامادەبووان كرد و سوپاسی هەموو لایەكی كرد كە بە تەقدیرەوە ئەو كارەیان هەڵسەنگاندووە، هەروەها زۆر سوپاسی گۆڤاری گوڵانی كرد كە ئەركی چاپی دووەمی ئەم رۆمانەی لە ئەستۆی خۆی گرتووە و دواتریش بەواژووی خۆی كتێبەكەی بەسەر ئامادەبوواندا دابەشكرد.