ئه‌نجوومه‌نى ئاسایشى نێوده‌وڵه‌تى له‌ دانیشتنێكدا به‌ توندى هێرش و په‌لاماره‌ تیرۆریستییه‌كانى چه‌كدارانى رێكخراوى تیرۆریستى ده‌وڵه‌تى ئیسلامى له‌ عێراق و شام ناسراو به‌ داعش ئیدانه‌ كرد و داواى له‌ سه‌رجه‌م عێراقییه‌كانیشى كرد كه‌ له‌ به‌رامبه‌ر ئه‌و هێرشانه‌ى داعش یه‌كبگرن.

ئه‌نجوومه‌نى ئاسایشى نێوده‌وڵه‌تى به‌ په‌له‌ دانیشتنێكى تایبه‌تى له‌باره‌ى هێرش و په‌لاماره‌ تیرۆریستییه‌كانى چه‌كدارانى داعش له‌ پارێزگاى موسڵ بۆ سه‌ر دانیشتوانى قه‌زاى سنجار سازكرد و له‌و دانیشتنه‌دا ئه‌ندامانى ئه‌نجوومه‌نه‌كه‌ به‌ تێكراى ده‌نگ به‌ توندى هێرش و په‌لاماره‌ تیرۆریستییه‌كانى داعش بۆ سه‌ر دانیشتوانى قه‌زاى سنجار له‌ پارێزگاى موسڵ ئیدانه‌ كرد .

له‌ دانیشتنه‌كه‌دا ئه‌نجوومه‌نى ئاسایش ئاماژه‌ى به‌وه‌دا، كه‌ هێرش و ده‌ستدرێژه‌كانى چه‌كداره‌ تیرۆریستییه‌كانى داعش بۆ سه‌ر كه‌میینه‌كان له‌ عێراق تاوانێكى گه‌وره‌ى مرۆڤایه‌تییه‌ و نابێت له‌ به‌رامبه‌ر ئه‌و تانه‌ش كۆمه‌ڵگاى نێوده‌وڵه‌تى بێ ده‌نگ بێت.