سەرۆكی هەرێمی كوردستان ئاوارەكانی شاری موسڵی لە كەمپی خازر بەسەر كردەوە
لەم سەردانەدا سەرۆك بارزانی وتەیەكی پێشكەشی ئاوارەكان كرد و لە وتەكەیدا بەخێرهاتنی ئاوارەكانی كرد و پیرۆزبایی جەژنی ڕەمەزانی لێ كردن و بە ئاوارەكانی ڕاگەیاند كە ئێوە لە وڵاتی خۆتان و لەنێو خوشك و براكانی خۆتانن. سەرۆك بارزانی ئەوەیشی باس كرد كە ئاگاداری كێشە و گرفتەكان و باری گوزەرانی ناخۆشی ئاوارەكانە لەگەڵ ئەوەیشدا داوای لە ئاوارەكان كرد كە خۆڕاگر بن چونكە ئەم دۆخە كاتییە و ئاوارەكان بە سەربەرزی بۆ شاری موسڵ و بۆ سەر ماڵ و حاڵی خۆیان دەگەڕێنەوە.
هەر لە قسەكانیدا سەرۆك بارزانی ئاماژەی بەوەدا كە جێگەی داخە وەك پێویست نەتوانراوە خزمەتتان بكەین بەڵام لەگەڵ گشت لایەك و ڕێكخراوە نێودەوڵەتییەكان لە پەیوەندی و كاركردنداین بۆ ئەوەی هاوكاری و یارمەتیی زیاتر بگەینرێتە خوشك و برا ئاوارەكانی موسڵ. سەرۆك بارزانی ئاوارەكانیشی لەوە دڵنیا كردەوە كە هەتا لە كوردستانن ژیان و ئاساییشیان پارێزراو دەبێت و هیوایشی خواست بەزووترین كات بگەڕێنەوە شاری موسڵ و شاری موسڵ شكۆ و شادیی جارانی خۆی بەدەستبهێنێتەوە.
