ئەندامانی ئەنجوومەنی نوێنەرانی عێراق، باس لە نایاساییبوونی بڕیارەكانی (نووری مالیكی) دەكەن لەبارەی پڕكردنەوەی شوێنی وەزیرە كوردەكانەوە. ئەوەیش دەخەنە ڕوو كە بڕیاری پڕكردنەوەی شوێنی وەزیرە كوردەكان لەلایەن (نووری مالیكی)ـەوە، نایاساییە.

دوای ئەوەی لە دژی قسەكانی (نووری مالیكی) كە تۆمەتی خستە پاڵ هەرێمی كوردستانەوە، وەزیرە كوردەكان بایكۆتی دانیشتنەكانی ئەنجوومەنی وەزیرانیان كرد و لە بەرانبەریشدا (مالیكی) كەسی خۆی لە شوێنەكانیان دانا، ئەندامی ئەنجوومەنی نوێنەرانی عێراق (ئەشواق جاف) بۆ KDP.infoگوتی: "بڕیاری پڕكردنەوەی شوێنی وەزیرە كوردەكان لەلایەن (نووری مالیكی)ـەوە نایاساییە و دەبێت كورد پابەندی نەبێت، چونكە بەپێی پێڕۆی ناوخۆی پەرلەمان دانانی هەر وەزیرێك دەبێت بە ڕەزامەندی ئەنجوومەنی نوێنەرانی عێراق بێت، كە ئێستایش ئەوە كراوە لە دەرەوەی ڕێنمایی پەرلەمان و دامەزاروەكانی حكوومەتی عێراقە".

هاوكات ئەندامی سەركردایەتیی یەكێتیی نیشتمانی لە كەركووك (سیروان ئەحمەد) بە KDP.infoـی ڕاگەیاند :"ئەوەی (مالیكی) كردی، شەڕێكی قورسە لە دژی هەرێمی كوردستان و تەواو شكستی حكوومەتەكەیشی دەرخستووە، لەگەڵ ئەوەیشدا دەیەوێت خۆی بخزێنێتە شەڕێكەوە كە بە ناهەق لە دژی هەرێمی كوردستان دەستی پێ كردووە، بەڵام سەرئەنجام خۆی زیانی گەورە دەكات".

گوتیشی: "(مالیكی) ئەم بارودۆخەی عێراقی قۆستووەتەوە و لە پێناو مانەوەی خۆیدا دەستووری بە تەواوی پێشێل كردووە".