لە دیدارێكی تایبەتدا بۆ گۆڤاری گوڵان فەخرەدین قادر سكرتێری پەرلەمانی كوردستان بۆ گوتى: دیارە زۆر گرنگە هاوكاری و هەماهەنگی لە نێوان هەرسێ دەسەڵاتەكەی سەرۆكایەتیی هەرێمدا هەبێت، كە ئەم سێ دەسەڵاتە باڵاترین دەسەڵاتی جێبەجێكردن و یاسادانانن، ئامادەبوونی سەرۆكی هەرێم لە دانیشتنی پەرلەمانی كوردستان خاڵێكی ئیجابی و باشە چونكە ئەو جەختی لەوە كردەوە كە دەبێ پەرلەمانی كوردستان مەرجەعی سەرەكیی هەرێمی كوردستان بێت، پێیوایە ئەمە شتێكی نوێیە كە جەنابی سەرۆكی هەرێم ئەمە دووپات دەكاتەوەو هەڵسەنگاندنێكی بەرزیشە بۆ ئەكتیڤكردنی پەرلەمانی كوردستان.

هەروەها فەخرەدین قادر گوتی: پێشتر لە پەرلەمانی كوردستان خوێندنەوەی یەكەممان بۆ پرۆژە یاسای دەستەی راپرسی هەڵبژاردن لە هەرێمی كوردستان كردووەو، لە ستراتیژی گرێدانی خولی دووەمی پەرلەماندا كە خوێندنەوەی دووەمی بۆ بكەین یان بیخەینە دەنگدانەوەو پەسند بكرێت، بۆیە پێمانوایە كە سەرەتای ئەم ئیشانە دەبێ بە رێكاری یاسایی دەست پێبكات، یەكەم دەبێ ئەم یاسایە پەسند بكەین، هەروەها یاسایەكی دیكەش كە هەر دوێنێ لەلایەن فراكسیۆنەكانی پەرلەمانەوە پێشكەشكرا، پاشان لیژنەیەكی دەستووری و یاسایی پێك بهێنرێت بۆ ئەوەی رێكارە یاساییەكانی ماددەی 140 و گەڕاندنەوەی هەر پارێزگا یان قەزا یان ناحییەك چۆنە بگیرێتەبەر.

شایانی باسە قادر گوتی: ئەگەر ئەم یاسایە پەسند بكرێت بۆ راپرسییەكەی ئەم جارە گرنگە، بەڵام دەبێ بزانین كە لە پەرلەمانی كوردستان زۆر جار باسی ئەوە كراوە كە ئێمە ئەزموونێكی باشمان هەبووە لە دوای رووخانی رژێم، ئێمە خاوەن حكومەت بووین، بەڵام حكومەتی ناوەند لە ساڵی 2003 پێكهاتووە، بۆیە پێویستە كوردستان خاوەنی دەستەیەكی راپرسی و هەڵبژاردن بێت بۆ هەڵبژاردنەكانی پەرلەمان زۆر گرنگە تەنانەت ئەم دەستەیە بۆ ئەنجامدانی راپرسیی جێگە ناكۆكی لەسەرەكان زۆر گرنگ و پێویستە.


بۆ خوێندنەوەی ئەم بابەتە لە گۆڤاری گوڵان ژمارە (984)