ئەمینداری گشتی یەكێتی جیهانی زانایانی ئیسلامی رایدەگەیەنێت هەر پێشمەرگەیەك لەكاتی بەرگریكردن بكوژرێت بە "شەهید" حساب دەكرێت.

د.عەلی قەرەداخی، ئەمینداری گشتی یەكێتی جیهانی زانایانی ئیسلامی، بە تۆڕی میدیایی رووداوی راگەیاند "هێزەكانی پێشمەرگەی كوردستان لە ئەركێكی ئاینی و پیرۆزدان بۆ بەرگریكردن لە سنووری هەرێمی كوردستان و خەڵكی ناوچە دابڕێندراوەكان، ئێمە بە پشتبەستن بە دەقەكانی قورئانی پیرۆز و فەرموودەی پێغەمبەری ئیسلام (د.خ) كە دەڵێ‌: هەر كەسێك بەگریی بكات لە نەفس و شەرەف و ماڵ و سامانی خۆی ‌و بكوژرێت شەهیدە، چونكە پێشمەرگە بەرگری لە خەڵكی مەزوڵمی ناوچە دابڕێندراوەكان دەكات و ئاسایش و ئارامی خەڵكی مەدەنی دەپارێزێت، بۆیە بەپێی ئاینی بەرزی ئیسلام ئەوان بە شەهید حساب دەكرێن".

قەرەداخی گوتیشی: "پێشمەرگە بەرگری دەكات لە خەڵكی مسوڵمان بە شیعەو سوننەو و غەیرە مسوڵمان، ئەوان دەستدرێژییان نەكردۆتە سەر كەس، بەڵكو لە حاڵەتی بەرگری و پڕكردنەوەی فەراغی ئەمنین لە سەر ئەم بنەمایە ئێمە كوژرەوەكانی پێشمەرگە بە شەهید حساب دەكەین ‌و ئەوانەی زوڵم و دەستدرێژی دەكەنە سەر ماڵ و موڵك و سەرو گیانی مسوڵمان و خەڵكی مەدەنی بێتاوان بە پێی شەرع شوێنیان ئاگری دۆزەخە".

لەدوای تێكچوونی رەوشی عێراق و پێشڕەویكردنی چەكدارانی رێكخراوی دەوڵەتی ئیسلامی لە عێراق و شام ناسراو بە "داعش" بۆ موسڵ و كۆنترۆڵكردنی، هێزی پێشمەرگەی كوردستان بەرەو ئەو ناوچانە جووڵێنرا كە سوپای عێراق تێیدا پاشەكشەی كردو ئێستاش تەواوی ناوچە دابڕێنراوەكان بە كەركووكیشەوە لەژێر كۆنترۆڵی پێشمەرگەدایە.