تایبەت بە KDP.info-بەڕێوەبەری ئاساییشی دوزخوورماتوو دەڵێت، پارێزگاری تكریت داوای هاوكاریی لە هێزی پێشمەرگە كردووە، بۆ ئەوەی شارەدێی سلێمان بەگ لە دەست چەكدارانی داعش رزگار بكەن، بەڵام تاوەكو ئێستا بڕیاریان نەداوە ئەو كارە ئەنجام بدەن.

بەڕێوەبەری ئاساییشی دوزخوورماتوو رائید فارووق ئەحمەد، بە kdp.infoـی ڕاگەیاند: لە سنووری شارۆچكەی دوزخوورماتوو بارودۆخەكە ئارام نییە، چونكە دوای ئەوەی دوێنێ هێزێكی زۆری سوپا و پۆلیسی عێراقی خۆیان رادەستی هێزی پێشمەرگە كرد، جێگەكەیان چۆڵ كردووە و داعش هاتوونەتە شوێنیان، بەڵام هیچ شەڕێك ڕووی نەداوە.

رائید فارووق ڕوونیشی كردەوە: لە دوێنێوە دوو لیوای هێزی پێشمەرگە هاتوونەتە نێو شارۆچكەی دوزخوورماتوو و دەوروبەری و كۆنتڕۆڵیان كردووە و چەكی قورسیشیان پێیە.

بەڕێوەبەری ئاساییشی دوزخوورماتوو زیاتر گوتی: سەرلەبەیانیی ئەمڕۆ پارێزگاری تكریت پەیوەندی بە ئێمەوە كرد و داوای كرد سلێمان بەگ لە داعش پاك بكەینەوە، بەڵام تا ئێستا بڕیارمان نەداوە ئەو كارە بكەین.

ئاماژەیشی دا كە لە ئێستادا ئەو ناوچەیە لە دەست ئاساییش و هێزەكانی پێشمەرگەدایە، تەنیا شارەدێی سلێمان بەگ و گوندێك نەبێت، كە ئەوانیش عەرەبنشینن.