ئاسایشی پارێزگای دهۆك رایگەیاند، ئەوان رێگا لە هاتنی ئاوارەکانی موسڵ ناگرن، بەڵكو تەنیا لێکۆڵینەوەیان لە زاڵگەكان لەگەڵ دەکرێت و بەڕێدەکرێن بۆ نێو شاری دهۆک و نزیکەی 5 هەزار کەسیش گەیشتوونەتە دهۆک.

بژار كورەماركی، بەرێوەبەری گشتی ئاسایشی دهۆك بەتۆڕی میدیایی رووداوی راگەیاند، ئێمە ناتوانین بەو شێوەیەی خەلك دێن، زاڵگەكانیان بۆ بكەینەوە و بهێڵین هەموویان دەربازی دهۆك ببن، بەڵام رێگەشمان نەگرتووە، تەنیا لێپێچینەوەیان لە زاڵگەكان لەگەڵ دەكەین، ئەوانەی نەخۆشن یان كەفیلیان هەیە یان یەكێك لە دهۆك دەناسن، رێگەیاندەدەین و تاوەکو ئێستاش نزیكەی 5 هەزار پەنابەر دەربازی شاری دهۆك بووینه.

بژار كورەماركی هەروەها رایگەیاند، بەهۆی زۆریی پەنابەرانی موسڵ لەرێگای دهۆک-موسڵ، رێگاکە قەرەباڵغ بووە و هاتووچۆ زەحمەتبووە.

بەرێوەبەری ئاسایشی دهۆك ئاماژەی بەوەشكرد، كە هەموو پێداویستییە سەرەتاییەکانیان لە زاڵگەكان وەک پێداویستییە تەندروستییەکان، ئاو و ئەمبوڵانس داناوە، بۆ ئەوەی هاوكاری ئەو پەنابەرانە بكەین.

کورەمارکی هەروەها رایگەیاند، کە نزیکەی 4 هەزار ئاوارەی موسڵ روویان لە قەزای ئاکرێ و دەورووبەری کردووە.








رووداو