نەوزاد هادی، پارێزگاری هەولێر بڕیاری دا كەمپێك بۆ ئاوارەكانی موسڵ دروستبكرێت، كە لە ترسی چەكدارانی داعش ناوچەكانی خۆیان جێهێشتووەو روویان لە هەرێمی كوردستان كردووە.

هەروەها رزگار مستەفا، قایمقامی قەزای خەبات بە (تۆڕی میدیایی رووداو)ی راگەیاند، "لە موسڵەوە تا بازگەی تلکێف بە هەزاران کەس بەڕێگاوەن، کە موسڵ جێدەهێڵن و لەگەڵ پارێزگای دهۆک لە پەیوەندیداین بۆ ئەوەی ئەو خەڵکە زۆرە لە خۆ بگرین و شوێنێکی گونجاویان بۆ بدۆزینەوە و ئەوەی کامپێکیان بۆ دروستبکەین".

قایمقامی خەبات دەشڵێ، "ئەو رەوشە کاریگەری نەکردووەتە سەر قەزای خەبات، لەگەڵ ئەوەشدا ئاماژە بەوە دەکات کە: "ئێمە نازانین ئەو رەوشە چەند دەخایەنێت، ئایا چەند رۆژێکە یان زیاتر، بۆیە ئێستا شۆفڵ و ئاو و ئەمبوڵانس و پێداویستییەکانی دیکەمان بەرەو خازر بردووە بۆ ئەوەی شوێنێکی گونجاو بدۆزینەوە و کامپەکەی تێدا دروست بکەین".

پەیامنێری تۆڕی میدیایی رووداو رایگەیاند، کە داعش دەستی بەسەر زیندانی بادووش لە موسڵ داگرتووە و بە سەدان بەندکراو رایانکردووە، رزگار مستەفا لەوەڵامی پرسیاری رێوشوێنەکانی جیاکردنەوەی هاووڵاتیانی کۆچکردوو لەگەڵ ئەو زیندانییانە و ئەگەری رووکردنیان بۆ هەرێمی کوردستان، گوتی: "ئەمە یەکێکە لە کێشە سەرەکییەکانی بازگەکانی هەرێمی کوردستان، چونکە جیاکردنەوەیان ئاسان نییە".

رزگار مستەفا ئاماژەی بە خاڵی پشکنینی خازر کرد و گوتی: "بە سەدان ئاسایش و هێزی زێرەڤانی وەستاون و تاوەکو دڵنیانەبن لەوەی ئەو کەسەی دێت هاووڵاتییە، ناهێڵن بێتە هەرێمی کوردستانەوە، چونکە پاراستنی ئاسایشی هەرێمی کوردستان لە هەموو شتێک گرنگترە".








رووداو