حكومەتی عێراقی فیدرال بڕیاری داوه بەرهەمی جۆی جووتیاران لە لایەن وەزارەتی بازرگانی و پیشەسازی وەرنەگیرێت و بودجەیان بۆ وەزارەتی كشتوكاڵی بەغدا تەرخان كردووە كە جۆی جووتیارانی سنوری خۆیان لە ناوەڕاست و خواروی عێراق بكڕنەوە و جووتیارانی هەرێمی كوردستانیان بێبەش كردووە.

لەمبارەیەوە د. ئەنوەر عومەر قادر بەڕێوەبەری گشتی پلان دانان و بەدواداچوون لە وەزارەتی كشتوكاڵ و سەرچاوەكانی ئاو لەبارەی كڕینەوەی جۆی جووتیارانی هەرێمی كوردستان بۆ ساڵی 2014 روونی كردەوە:

بۆ ئەوەی جووتیارانی هەرێم زەرەرمەند نەبن، وەزارەتی كشتوكاڵ و سەرچاوەكانی ئاوی حكومەتی هەرێمی كوردستان لە داهاتی نەوت و گازی وەزارەتی سامانە سروشتییەكان بودجەی پێویستی بەدەستهێنا و ئەم كارەی لە ئەستۆ گرت بۆ پاڵپشتی جووتیاران و بەرهەمی جۆ لە هەرێمی كوردستان و جۆی جووتیاران بۆ ساڵی 2014 وەردەگرێتەوە .