بەشداربوویەكی كۆبوونەوەی نوێنەری پارتە سیاسییەكانی کوردستان لەگەڵ سەرۆكی هەرێمی كوردستان، راگەیاند، "دوێنێ بڕیار لەسەر كۆمیتەی دانوستاندنكاری كورد لەگەڵ بەغدا درا و هەر لەو كۆبوونەوەیەدا، هەر حیزبە و نوێنەری خۆی ئاشكراكرد".

محەممەدی حاجی مەحموود، سکرتێری حیزبی سۆسیالیست دیموکراتی کوردستان، کە رۆژی شەممە 17.5.2014، لە کۆبوونەوەی مەسعود بارزانی، سەرۆکی هەرێمی کوردستان و نوێنەری لایەنە کوردستانییەکان بەشداربوو، بە تۆڕی میدیایی رووداوی رایگەیاند، بڕیارە ئەو لیژنەیە سەردانی بەغدا بكەن بۆ دانوستاندن لەگەڵ هێزە سیاسییەكان و راستەوخۆش سەر بە سەرۆكایەتی هەرێمی كوردستان دەبن.

محەممەدی حاجی مەحموود، ناوی ئەندامانی لیژنەكەی ئاشكراكرد، كە بریتین لە:

رۆژ نووری شاوەیس، نوێنەری پارتی دیموکراتی کوردستان

فوئاد مەعسوم، نوێنەری یەكێتیی نیشتیمانیی کوردستان

بیلال سلێمان، نوێنەری كۆمەڵی ئیسلامی کوردستان

كاوە مەحموود، نوێنەری شیوعی، سۆسیالیست و زەحمەتكێشان

هەریەك لە یەكگرتووی ئیسلامی و بزووتنەوەی گۆڕانیش نوێنەری خۆیان دەبێت.

جەلال جەوهەر، یەكێك لە نوێنەرەکانی بزووتنەوەی گۆڕان لە كۆبوونەوەی رۆژی شەممەی لایەنە سیاسییەكان لەگەڵ سەرۆكی هەرێمی كوردستان و غازی سەعید، ئەندامی مەكتەبی سیاسی یەكگرتووی ئیسلامی كوردستان سەبارەت بە نوێنەری حیزبەكانیان لە لیژنەی دانوستاندنكاری كورد لەگەڵ بەغدا، بە تۆڕی میدیایی رووداویان راگەیاند، "هێشتا نوێنەرەكەمان دەستنیشان نەكردووە و ئەمڕۆ یەکشەممە 18.5.2014 بە دڵنیاییەوە دەستنیشانی دەكەین".






رووداو