له‌ گوندی ئاڵانه‌ی سەر بە شاره‌دێی حاجی ئۆمه‌ران، مینێكی دژه‌ كه‌سی به‌ هاووڵاتیه‌كی دانیشتووی خانێی رۆژ هه‌ڵات ته‌قیه‌وه‌ و دوای گه‌یاندنی بۆ نه‌خۆشخانه‌ی چۆمان، به‌ هۆی سه‌ختی برینه‌كانیه‌وه‌ ره‌وانه‌ی نه‌خۆشخانه‌ی فریاكه‌وتنی هه‌ولێر كرا.


وه‌ك به‌رپرسی بنكه‌ی پۆلیسی چۆمان باسی لێوه‌كرد، له‌ ناوچه‌ سه‌ر سنوورییه‌كان ژماره‌یه‌ك له‌ كوردانی رۆژهه‌ڵات له‌ گونده‌كان كرێكاری ده‌كه‌ن و به‌ هۆی ناشاره‌زانەبوونی یه‌كێك له‌و هاووڵاتیانه‌ به‌ ناوی واحید عه‌لی ته‌مه‌ن 28 ساڵ، دانیشتووی خانێی رۆژ هه‌ڵات ده‌چێته‌ ناوچه‌یه‌كی پیس بوو به‌مین له‌ گوندی ئاڵانه‌ی سنووری حاجی ئۆمه‌ران و مێنێكی جۆری ڤاڵمارای پیادا ده‌ته‌قێته‌وه‌ و ده‌گه‌یه‌ندرێته‌ نه‌خۆشخانه‌ی چۆمان.



لای خۆشیه‌وه‌ به‌رێوه‌ به‌ری ته‌ندروستی چۆمان ئه‌حمه‌د حه‌سه‌ن به‌ ئاژانسی هه‌واڵی په‌یامنێری راگه‌یاند: بریندارێكی رۆژهه‌ڵات كه‌ مینی پیادا ته‌قیبوویه‌وه‌ گه‌یه‌ندرایه‌ نه‌خۆشخانه‌ و دوای پێدانی چاره‌سه‌ری ته‌ندروستی سه‌ره‌تایی به‌هۆی په‌رینی قاچی چه‌پی و بریندار بوونی به‌شی زۆری جه‌سته‌ ره‌وانه‌ی نه‌خۆشخانه‌ی فریاكه‌وتنی هه‌ولێر كرا.