پەرلەمانتارێکی لیستی هاوپەیمانی کوردستانی مەرجەکانی کورد بۆ بەشداریکردن لە حکومەتی داهاتووی عێراق ئاشکرا دەکات کە بریتین لە پابەند بوون بە دەستوور و گەرەنتی جێبەجێ کردنی داخوازیەکانی کورد.


ئەندامی ئەنجومەنی نوێنەرانی عێراق لە لیستی هاوپەیمانی کوردستانی، ئازاد زەینەڵ، لەلێدوانێکی تایبەت بۆئاژانس وڕادیۆی پەیامنێر گووتی: "مەرجی ئێمە بۆ بەشداربوون لەحکومەتی داهاتووی عێراق ئەوەیە کە دەبێت گەرەنتی وەربگرین سەرۆک وەزیران پابەند بێت بە دەستوور و شەریکی ڕاستەقینەی حکومەت بین. هاوکات داخوازیە دەستووریەکانیشمان جێبەجێ بکرێت".



گوتیشی: "ئێمە کێشەی شەخسمان نییە،ئەوەندەی کێشەمان داخوازیەکانی کورد و پابەند بوونە بە دەستووری عێراق چونکە لە ڕابردوودا ئەزموونی تاڵمان بینی لەگەڵ هەندێک لایەن".



ڕاشیگەیاند: "داخوازیەکانی کورد ڕوون و ئاشکران. هیچ یەکێک لە داخوازیەکانیشمان لە دەرەوەی دەستووردا نەبووە و هەمووی لەچوارچێوەی دەستووری عێراقدا بووە،بەڵام تاکو ئێستا جێبەجێ نەکراون".