دوای ئەوەی لە شەوی رابردووە، ناحیەی سلێمان بەگ كەوتە ژێر دەستی چەكدارانی داعشەوە، ئەمرۆ دوو لیوای دیكەی سوپای عێراق رەوانەی ناوچەكە كراو بە وتەی سەرچاوەیەك لە پاش نیوەرۆی ئەمرۆوە هێرشەكانی سوپای عێراق بۆ ناحیەكە دەستی پێكردووە و هێزە ئەمنیەكان چوونەتە ژوورەوە.



شەوی رابردوو چەكدارانی داعش توانییان پاشەكشە بە هێزە ئەمنییەكان بكەن و ناحیەی سلێمان بەگ لە سنووری شارۆچكەی دووزخورماتوو بخەنە ژێر كۆنترۆڵی خۆیانەوە.



سەرچاوەیەكی ئەمنی بەرپرس لە دووزخورماتوو بە ئاژانسی هەواڵی پەیامنێری راگەیاند: بە مەبەستی كۆنترۆڵكردنەوەی ناحیەی سلێمان بەگ و دەركردنی چەكدارانی داعش لە ناو ناحیەكە، پاش هاتنی دوو لیوای دیكە بۆ سنوورەكە، لە پاش نیوەرۆی ئەمرۆوە هێرشەكانی هێزە ئەمنیەكان بۆسەر ناحیەكە دەستپێكردووە و توانیویانە بچنە ناو ناحیەكەوە.



ئەو سەرچاوەیە ئاماژەشیدا، هێز ئەمنییەكان لە چەند لاوە هێرش دەكەن و لە لایەن چەكدارەكانیشەوە وەلام دەدرێنەوە و شەڕوپێكدادانەكان بەردەوامە و چەندین جۆر چەكی قورسی تێدا بەكاردەهێندرێت.