کۆبوونەوەکەی نێچیرڤان بارزانی و نووری مالیکی کاژێر 4ـی ئێوارە بەڕێوەدەچێت
شاندێكی حكومەتی هەرێمی كوردستان بەسەرۆكایەتی نێچیرڤان بارزانی دەچێتە بەغدا ، بەمەبەستی گفتوگۆكردن لەبارەی رێككەوتنی هەناردەكردنی نەوتی هەرێمی كوردستان بۆ توركیا و ، بودجەی 2014 و كێشە هەڵواسراوەكانی نێوان هەولێر و بەغدا.
بەپێی سەرچاوەكانی تۆڕی میدیایی رووداو ، ئەو شاندەی حكومەت بەسەرۆكایەتی نێچیرڤان بارزانی سەرۆكی حكومەتی هەرێمی كوردستان پێكدێت لە عیماد ئەحمەد جێگری سەرۆكی حكومەت ، د.عەلی سندی وەزیری پلاندانان ،سەفین دزەیی وتەبێژی حكومەت و چەند بەڕێوەبەرێك لە وەزارەتی دارایی.
هەر بەپێی ئەو سەرچاوانەی رووداو ، كارنامەی كۆبوونەوەی سەرۆك وەزیرانی كوردستان لەگەڵ نوری مالیكی سەرۆك وەزیرانی عێراق لە كۆشكی سەرۆكایەتی حكومەت لە بەغدا بەڕێوەدەچێت ، پێكدێت لە گفتوگۆكردن لەسەر باری ئەمنیی كەركووك و كێشەی ناوچە ناكۆكی لەسەرەكان بەپێی دەستووری عێراق ، هەروەها رێككەوتنی هەناردەكردنی نەوت وغازی هەرێمی كوردستان لەگەڵ توركیا، لە رێگەی هێڵی نەوتیی هەرێمی كوردستان – توركیاوە ، كە 50%ی بە نرخێكی هەرزانتر بۆ توركیا دەبێت و 50%یشی بۆ بازاڕەكانی جیهان دەبێت.
رووداو
