8ی تشرینی دووه‌م/ ئۆکتۆبەر(گولان میدیا)- ھاوڵاتیانی خۆشەویست ئاگادار دەکەینەوە کە پرۆسەی لێکۆڵینەوە لە کردارە تیرۆریستیەکەی رۆژی ٢٩/٩ی بەردەم ئاسایشی ھەولێر لە کۆتایی نزیک بۆتەوە و ئەنجامی باش بەدەست کەوتوون. دوای شەش ساڵ لە پوچەڵکردنەوەی ھەوڵەکانی تیرۆریستان بۆ تێکدانی ئارامیی ھەرێم، ژمارەیەک تیرۆریست توانیان لە کۆتایی مانگی ڕابردوو ئەو ئاسانکاریانە بقۆسنەوە کە بۆ ھاتنە ناوەوەی ھاوڵاتیانی ناوچەکانی دیکەی عێراق دەستەبەر کراون و دزەیان کردە ناو ھەرێم.
تیرۆریستان ئامانجیان گەیشتن بۆ ناو باڵەخانەی ئاسایش بوو، بۆیە دوو ئۆتۆمبێلیان لەبەردەم دەروازەی ئاسایشی ھەولێر تەقاندەوە و دواتر ٢ خۆکوژی تر بە چەک و پشتێنی بۆمبرێژکراو بە سوود وەرگرتن لە کەلێنی دوای تەقینەوە ھەوڵیان دا بگەنە ناو ئاسایش، بەڵام ڕووبەڕووی بەرگریی قارەمانانەی ئەفسەرانی ئاسایش بوونەوە و نەیانتوانی ئامانجەکەیان بپێکن و گشت تیرۆریستان کوژران و شکستیان ھێنا. ئەم نەبەردییەی کارمەندانی ئاسایش بە خوێنی ٧ کارمەندی قارەمان تۆمار کرا و ھەروەھا لە ئەنجامی تەقینەوەکان ٧٢ کەس لە کارمەندانی ئاسایش و پۆلیس و تەندروستی و بەرگریی شارستانی بریندار بوون. دەستکردنەوە و قارەمانیی ئەو ٧ شەھیدەی ئاسایش ھەڵوێستێکی مێژوویی و نمونەیی فیداکاری بوو و یادی ئەم خۆراگرییەیان ھەمێشە لای گەلەکەمان بە زیندووی دەمێنتەوە.
دوای ڕووداوەکە یەکسەر لێکۆڵینەوەکان لە لایەن تیمە بسپۆرەکانەوە دەستی پێکرا و بە ھاوکاریی ھاوڵاتیان و دڵسۆزانی گەلەکەمان سەرەداوی باش بەدەست ھاتن و توانرا چەند کەسێک لە دارێژەران و ھاوکارانی کردەوەکە دەستگیر بکرێن و دانیان بە تاوانەکەیان ناوە. ئەم تیرۆریستانە سەر بە دەوڵەتی ئیسلامیی عێراق و شامن و لێکۆلینەوەکان بەردەوامن و لە ماوەیەکی نزیکدا ھاوڵاتیانی خۆشەویستمان لە وردەکاریی زیاتر و ئەنجامی کۆتایی ئاگادار دەکەینەوەوە. ھەر لێرەدا ھاوڵاتیانی ئازیزمان دڵنیا دەکەینەوە کە بە ھەموو توانایەک بەرپەرچی ناحەزان وتیرۆریستان دەدەینەوە و پشت بە خوا و بە ھاوکاری و پاڵپشتیی ئێوەی خۆشەویست، ھەرێمی کوردستان بە دورگەی ھەمیشە ئارامی پێشکەوتن و سەقامگیری دەمێنتەوە.
ئەنجومەنی ئاسایشی ھەرێمی کوردستان
٨/١٠/٢٠١٣