23ی ئەیلول/ سپتەمبەر(گولان میدیا)- بە مەبەستی كردنەوەی لقێكی بانكی ستاندارد چارتەرد ی بەریتانی لە هەرێمی كوردستان ، ،ئەمجەد عومران خان ، بەڕێوەبەری كارگێری و سەرۆكی گەرتی گشتی لە ڕۆژهەڵاتی ناوەڕاست و باكوری ئەفریقا و پاكستان سەردانی وەزارەتی دارایی و ئابووری حكومەتی هەرێمی كوردستانی كرد و لەگەڵ ، رەشید تاهیر ، بریكاری وەزارەتی دارایی و ئابووری پرسی كردنەوەی لقی بانكی ناوبراویان تاوتوێ كرد.

لە كۆبوونەوەیەكدا كە بەڕێوەبەری گشتی ناوەندی بانكی هەرێم ئامادەبوو ، بەڕێوەبەری بانكی ، ستاندارد چارتەرد ، ئاماژەی بە كردنەوەی لقی بانكەكەیان لە هەرێمی كوردستان كرد ، بۆ ئەوەی بتوانن لە بواری كەرتی بانكی و دارایی ڕۆڵ و بەشداری كارایان هەبێت . وە هەروەها هەرێمی كوردستانیان بە ناوچەیەكی ئارام وەسف كرد.

لە بەرامبەردا بریكاری وەزارەتی دارایی خۆشحاڵی خۆی بە كردنەوەی بانكی ، ستاندارد چارتەرد ، لە هەرێمی كوردستان دەربڕی و هیوای خواست لەو بانكەدا مامەڵە داراییەكان بە رێك و پێكی ڕایی بكرێن و هاوكاری كەرتی تایبەت بن لە ڕووی پێدانی قەرز و ئاسانكاری بانكی.

هەروەها بریكاری وەزارەت داواشی كرد بانكی ناوبراو بتوانن هاوكاری فەرمانبەرانی بانكی بن لە ڕووی كردنەوەی خولی جۆراو جۆر بۆ بەرزركردنەوەی ئاستی فەرمانبەرانی بانكی ، لە كۆتایشدا بریكاری وەزارەت ئامادەیی وەزارەتی دارایی و ئابووری نیشاندا بۆ هەر هاوكاری و هەماهەنگییەك.