پەرلەمانی لوبنان بە زۆرینەی دەنگ متمانەی بە حکوومەتی نوێی وڵاتەکەی دا.



جگە لە پارتی کەتایبی مەسیحی، کە خاوەنی سێ کورسییە، لەگەڵ سێ پەرلەمانتاری دیکە، هەموو حزب و لایەنەکانی دیکە دەنگیان بە بەخشینی متمانە بە کابینەی نوێی حکوومەت بە سەرۆکایەتیی سەعد حەریری، دا.



کۆبوونەوەکەی متمانە بەخشین بە کابینەی نوێی حکوومەت لە رۆژی هەینی 15-2-2019 بە ئامادەبوونی 117 ئەندام لە کۆی 128 ئەندامی پەرلەمانی لوبنان، ئەنجام درا و کابینەی نوێی حکوومەتیش دەنگی 111 پەرلەمانتاری بەدەست هێنا.



رۆژی 6/5/2018، هەڵبژاردنی گشتیی لە لوبنان ئەنجام درا و دوای راگەیاندنی ئەنجامەکانیش، حەریری بۆ پێکهێنانی کابینەی نوێی حکوومەتی ئەو وڵاتە، راسپێردرا و تا ئێستا حزب و لایەنەکان لەسەر پێکهێنانی حکوومەت، رێک نەکەوتوون.



لوبنان وڵاتێکی عەرەبییە و کەوتووەتە رۆژهەڵاتی دەریای ناوەڕاست، لە هەرسێ پێکهاتەی عەرەبی سوننە، عەرەبی شیعە و مەسیحی پێک دێت و پۆستە سیادییەکان بەپێی عورفێک بەمشێوەیە یەکلا کراونەتەوە؛



- سەرۆکایەتیی کۆمار بۆ پێکهاتەی مەسیحی

- سەرۆکایەتیی وەزیران بۆ پێکهاتەی سوننەمەزهەب

- سەرۆکایەتیی پەرلەمان بۆ پێکهاتەی شیعەمەزهەب



بەهۆی ناکۆکیی سیاسیی و دەستوەردانی وڵاتانی دەرەکی، لە ساڵی 1975 تا 1990 شەڕی ناوخۆیی لەنێوان پێکهاتەکان دروست بوو و بووە هۆی کوژرانی 120 هەزار کەس و ئاوارەبوونی زیاتر لە یەک ملیۆن کەس لە ناوخۆی وڵاتەکە.



حزبوڵڵای لوبنانی، کە خاوەن میلیشیایەکی بەهێزی چەکدارییە، نوێنەرایەتیی پێکهاتەی شیعەمەزهەب دەکات و حەسەن نەسروڵڵای ئەمینداری ئەو حزبەش چەند جارێک رایگەیاندووە، کە کۆماری ئیسلامیی ئێران چەک و پارەی حزبەکەی دابین دەکات.


باسنیوز