وەزیری دەرەوەی دانیمارک لە تویتێکدا ئاشکرای کردووە یەکێتیی ئەورووپا بەهۆی "داڕشتنی پلانی تیرۆر لە ئەورووپا" لەلایەن ئێرانەوە ڕازی بووە گەمارۆ بخرێتە سەر ناوەندێکی ئەمنی و هەواڵگریی ئێران.

ئاندرێس ساموئێلسۆن، لە ئەکاونتی خۆی لە تۆڕی کۆمەڵایەتیی (تویتەر) نووسیویە: "یەکێتیی ئەورووپا ڕازی بووە بەوەی گەمارۆ بخرێتە سەر یەکێک لە ناوەندە ئەمنی و هەواڵگرییەکانی ئێران و ئەویش لەبەر "داڕشتنی پلانی تیرۆر لەناو خاکی یەکێتیی ئەورووپا".

وەزیری دەرەوەی دانیمارک ئاماژەی بەوەش کردووە: "ئەمە ڕۆژێکی گرنگە بۆ سیاسەتی دەرەوەی یەکێتیی ئەورووپا، چونکە ئێمە هیچ کات ڕەفتاری لەو چەشنە لەلایەن ئێرانەوە قەبووڵ ناکەین".

لە ماوەی چەند مانگی ڕابردوودا لە وڵاتەکانی دانیمارک، بەلجیکا و ئەڵمانیا و فەرەنسا چەندین هاووڵاتیی ئێرانی دەستگیر کران کە بەتەمای تەقینەوە و کوشتنی چالاکوانانی سیاسیی دژبەری ئێران بوون، کە ئەمەش بووەتە ساردیی پەیوەندییەکانی ئێران و چەند وڵاتێکی ئەورووپی.











باسنيوز