دەنگۆ هەیە بیناڵی یڵدرم سه‌رۆكی ئێستەی په‌رله‌مانی توركیا بكرێتە كاندیدی ئاكپارتی بۆ سه‌رۆكی شاره‌وانی ئیسته‌نبۆڵ، میدیاكانی توركیا پێیانوایه‌ ئه‌و به‌هێزترین كاندیده‌ به‌لای ره‌جه‌ب ته‌یب ئه‌ردۆغانه‌وه‌ بۆ پۆستی سەرۆكی شارەوانی ئیستەنبۆڵ.

لەمبارەیەوە رۆژنامه‌ی (پۆسته‌) پرسیاری له‌ بیناڵی یڵدرم كردووه‌ ئایا راسته‌ كاندیدی ئاكپارتییە بۆ سه‌رۆكی شاره‌وانی ئیسته‌نبۆڵ؟ ئەویش رەتی كردووەتەوە و گوتوویەتی ئه‌و ده‌نگۆیانه‌ درۆن و راست نین، هه‌ر میدیایه‌كیش شتی وای بڵاو كردبێته‌وه‌، بڕوای پێمه‌كه‌ن.

به‌ڵام ماڵپه‌ڕی (سۆڵ)ـی توركی بڵاوی كرده‌وه‌، هه‌رچه‌نده‌ بیناڵی یڵدرم بڵێت درۆیه‌ و نابمه‌ كاندیدی ئاكپارتی بۆ سه‌رۆكی شاره‌وانی ئیسته‌نبۆڵ، ئه‌و هه‌ر كاندیدێكی به‌هێزه‌ و ئه‌گه‌ر ره‌جه‌ب ته‌یب ئه‌ردۆغان داوای لێ بكات، ناتوانێت ره‌تی بكاته‌وه‌.

بیناڵی یڵدرم سه‌رۆكی ئێستەی په‌رله‌مانی توركیایه‌ و پێشتر سه‌رۆك وه‌زیران بوو. ئه‌و كه‌سایه‌تییه‌كی زۆر نزیكی ئه‌ردۆغانه‌ و پێشتریش به‌ڕێوه‌به‌ری پاسه‌كانی ئیسته‌نبۆڵ بووه‌، هه‌روه‌ها له‌ كابینه‌كه‌ی ئه‌حمه‌د داودئۆغلوش وه‌زیری گواستنه‌وه‌ بوو.











باسنيوز