روانگەی سووری بۆ مافەکانی مرۆڤ رایدەگەیەنێت، کە میلیشیا ئێرانییەکان لە رۆژئاوای رووباری فورات لە سووریا کۆ دەبنەوە و خۆیان جێگیر دەکەن.



لە بەیاننامەیەکدا، روانگەی سووری بۆ مافەکانی مرۆڤ رایگەیاندووە، هێز و میلیشیا ئێرانییەکان لە هەزاران چەکدار پێک هاتوون و جگە لە رووی سەربازی، دەست لەکاروباری ئەمنیی و ئابووریی سووریاش وەردەدەن.



روانگەی سووری بۆ مافەکانی مرۆڤ ئاماژەی بەوەش کردووە، کە میلیشیا ئێرانییەکان لە رۆژئاوای رووباری فورات بەتایبەت لە شارەکانی ئەلبوکەمال و مەیادین لە پارێزگای دێرەزوور لە سەر سنووری نێوان عێراق و سووریا، جێگیر بوون.



لە سەرەتای شەڕی ناوخۆیی سووریاوە، کۆماری ئیسلامیی ئێران بە ناردنی چەک و چەکدار، پاڵپشتیی رژێمی سووریا دەکات.



لە مانگی ئاداری 2011ـەوە شەڕی ناوخۆیی لە سووریا لەنێوان گرووپەکانی ئۆپۆزیسیۆن، رێکخراوە تیرۆریستییەکانی داعش و قاعیدە و رژێمی سووریا دروست بووە.



بەھۆی ئەو شەڕانەوە، کە سەراپای وڵاتەکەی گرتووەتەوە، زیاتر لە پێنج ملیۆن ھاووڵاتیی لە ناوخۆی وڵاتەکە، بۆ وڵاتانی دەوروبەر و جیھان ئاوارە بوون و زیاتر لە نیو ملیۆن کەسیش گیانیان لەدەست داوە.





باسنيوز