بەپێی هەواڵی ماڵپەڕەکانی سەر بە سوپای پاسداران، بەرەبەیانی ئەمڕۆ سێشەممە 14 چەکداری "بەسیج"ی سەر بە سوپای پاسداران لە خاڵی سنووریی "میرجاوە"ی سەر بە پارێزگای سیستان و بەلووچستان لەلایەن گرووپێکی چەکدارەوە ڕفێندراون.



ماڵپەڕی (فارسنیوز)ی سەر بە سوپای پاسداران لەمبارەوە بڵاوی کردووەتەوە: "کاتژمێر 4:30ی بەرەبەیانی ئەمڕۆ سێشەممە 2018/10/16 حەوت چەکداری بەسیجی ئاسایس، پێنج چەکداری سنوورپارێز و دوو کادیری ئیتلاعاتی سوپای پاسداران لە خاڵی سنووریی "لوولکدان"ی سەر بە شاری "میرجاوە" لە پارێزگای سیستان و بەلووچستان لەلایەن هێزیکی چەکدارەوە ڕفێدراون و چارەنووسیان نادیارە".



لەمبارەوە "ڕێکخراوی جەیشولعەدڵ"ی سەر بە نەتەوەی بەلووچ کە ڕێکخراوێکی ئایینی و میللیە و داکۆکی لە مافی بەلووچ دەکات لە کەناڵی فەرمیی خۆیان لە تۆڕی کۆمەڵایەتیی (تەلەگرام) بەرپرسیارێتیی ئەو کارەیان گرتووەتە ئەستۆ، بەڵام وردەکاریی زیاتریان بڵاو نەکردووەتەوە.



باسنیوز