راوێژکارێکی رێبەری باڵای کۆماری ئیسلامیی ئێران سعودیە بە هاندانی خۆپیشاندەران بۆ سووتاندنی کونسوڵخانەی وڵاتەکەی لە بەسرە، تۆمەتبار دەکات.



عەمید حوسێن دەهقان، راوێژکاری ئایەتوڵڵا عەلی خامنەیی، رێبەری باڵای شۆڕشی ئیسلامیی ئێران بە میدیاکانی وڵاتەکەی راگەیاندووە، ”ئاژاوەیەکی گەورە“ لەئارا دایە، کە هەرسێ وڵاتی ئەمریکا، ئیسرائیل و سعودیە سەرپەرشتی دەکەن.



عەمید حوسێن دەهقان سعودیەی بە هاندانی خۆپیشاندەران بۆ سووتاندنی کونسوڵخانەی وڵاتەکەی لە بەسرە تۆمەتبار کردووە و رایگەیاندووە، ”سعودیە لەڕێی ئەو سووتاندنەوە، بە خەڵکی بەسرە و عێراقی گوتووە ”ئەگەر حکوومەتێکی نزیک لە ئێران هەڵبژێرن، ئاواتان بەسەردێنم“.



رۆژی هەینی 7/9/2018، خۆپیشاندەرانی بەسرە کونسوڵخانەی ئێرانیان سووتاند و هوتافیان دژی هەژموونی ئەو وڵاتە لە عێراق، دەکێشا.



ئەو خۆپیشاندانانە لە ناوەڕاستی مانگی 7ـی ئەمساڵەوە دژی نەبوونی ئاوی خواردنەوە، کارەبا دەستیان پێ کرد، بەڵام حکوومەت و میلیشیا عێراقییەکان لە بری دابینکردنی داوا رەواکانیان، بە گوللە وەڵامیان دەدەنەوە.




باسنیوز