حەسەن روحانی، سەرۆك كۆماری ئێران بۆ وەڵامدانەوەی پرسیارەكانی پەرلەمان لەسەر دۆخی وڵاتەكەی ئامادەی كۆبوونەوەی ئەمڕۆی پەرلەمان بوو، ئاماژەی بەوە كرد، كە كەسانێك لە ناوخۆی ئەو وڵاتە ھەرەشەی تیرۆریان لێكردووە.

روحانی لەكاتی ئامادەبوونی بۆ وەڵامدانەوەی پێنج پرسیاری پێشتر ئامادەكراو بەرامبەر بە پەرلەمانتاران رایگەیاند كە دۆخی وڵات دوای خۆپێشاندانە بەرفراوانەكەی ساڵی رابردوو گۆرا و ئەوەش بووە ھۆی ئەوەی سەرۆكی ئەمریكا بیانووی دەستكەوێت بۆ زیاتر پەرەپێدانی ناسەقامگیری ئێران.

بە وتەی روحانی ھەندێك لایەنی ناوخۆیی زانیاری ھەڵەیان داوەتە خەڵك و تەنانەت ھەڕەشەی تیرۆر كردنی ئەویان كردووە.

روحانی راشیگەیاند، ئەوانەی باسی تیرۆركردنی منیان دەكرد پێیان وابوو پەیوەندییەكانی سەرۆك كۆمار و دەسەڵاتی دادوەری و پەرلەمان خراپە و ھەر بۆیەشە دەرفەتیان بۆ ناسەقامگیری دۆخی وڵات خوڵقاندووە.

بانگھێشتی سەرۆككۆماری ئێران بۆ پەرلەمان، دوای سەرھەڵدانی قەیرانی ئابووری لەو وڵاتە و بەردەوامی ناڕەزایەتی و خۆپیشاندانەكانی خەڵك دێت.

ئەمە لە كاتێكدایە دوو رۆژ لە مەوبەر لە 26/8/2018، مەسعود كەرباسیان وەزیری ئابووری و دارایی ئێران، بانگێشتی پەرلەمان كرا و لەكار لادرا، كە سێیەمین وەزیری كابینەكەی روحانییە، بەھۆی قەیرانی ئابووری ئەو وڵاتەوە لە كارەكانیان دوور دەخرێنەوە.




K24