Qaymeqamê qeza Şingalê aşkera kir, îro 29.11.2020ê gelek grub û taximên ser bi PKKê bi bahaneyên cuda ve mayîna xwe li wî sînorî bi navê xelkê Şingalê xwepêşandan dikin, ku bi ti awayekî nûnertiya xelkê Şingalê nakin, ji ber ew dem bi dawî bû PKK bikare li Şingalê aloziyê çêbike.

Vê derbarê de qaymeqamê Şingalê Mehma Xelîl ji BasNewsê re ragehand: ‘’PKK hemû hewlekî dide nav Şingalê bimîne û hikûmeta Iraqê jî rijde li ser derxistina PKKê li wî sînorî û xwepêşandanên îro grubên PKKê dikin, nûnertiya xelkê Şingalê nakin, ji ber xelkê Şingalê aramî û seqamgirî û avadaniyê bo deverê dixwazin.’’

Qaymeqamê Şingalê got: ‘’Li gor biryar û li gor xalên rêkeftina navbera hikûmeta herêma Kurdistanê û hikûmeta Iraqê divê PKK ji hemû binke û baregehên xwe yên nav Şingalê derkeve û radestî hikûmeta Iraqê bike û naha jî polîsê federal nav Şingalê bo wê armancê kar dikin.’’

Mehma Xelîl amaje bi wê yekê jî kir ku: ‘’Polîsê federal bo dabîn kirina asayîş û seqamgiriya Şingalê dest bi çalakiyê kiriye û li gor biryarê gelek grub û hêzên çekdar nav Şingalê de hene ku ser bi PKKê ne wek ‘’YPŞ, Berxwedana Şingal û Hêzên Parastina Şingal’’ û gelek hêzên din ên bi navên cuda li Şingalê hene ku piraniya wan ser bi PKKê ne, divê demekî herî zû de Şingal bê vala kirin, heta ku aramî û seqamgirî vegere navçeyê.’’

Basnews