Berdevkê Polîsê Kerkûkê Amir Nûrî Şiwanî ragihand ku du zarokan keçikeke 3 salî biriye cihekî vala û ew dehf daye nav hewzekî avê û ew keçik xeniqiye.

Wî diyar kir ku tohmetbar hatine desteserkirin û li sûcê xwe mikur hatine.

Berdevkê Polîsê Kerkûkê Amir Nûrî Şiwanî li ser mijarê Rûdawê re got:

"8ê Tîrmeha 2026an li taxa Huzeyranê ya Kerkûkê bûyerek qewimî. Du kurikên 10 salî, keçikeke 3 salî biriye cihekî vala da ku destdirêjiyê lê bikin.

Tohmetbaran piştî ku ew keçik biriye cihê vala, destdirêjî lê nekiriye lê paşê ew dehf daye û xistiye nav hewzekî û keçik xeniqiye."

Lêpirsîn didome

Amir Nûrî Şiwanî eşkere kir ku her du zarok Ereb in û ji aliyê polîsan ve hatine desteserkirin û got:

"Niha dosyeya lêkolînê ji bo wan hatiye vekirin û ew li sûcê xwe mikur hatine."

Qanûn li ser vê yekê çi dibêje?

Parêzerê Şêwirmend ê li Dadgeha Temyîzê ya Hewlêrê Birzo Seîd, li ser rêkarên qanûnî yên pêwendîdarî bûyerê ji Rûdawê re got:

"Ew zarok li Kerkûkê hatine desteserkirin lê ji ber temenê wan ceza wan nagire."

Birzo Seîd amaje bi qanûneke ku li Herêma Kurdistanê û Îraqê di meriyetê de ye kir û anî zimên:

"Li gorî Qanûna Nûciwanan a Îraqê ya bi hejmara 76an a sala 1983yan, her kesê ku temenê wî ji 11 salan kêmtir be, ti berpirsyariya cezakirinê nakeve ser milê wî û qanûn wî nagire."

Malbat dikare qerebûyê bixwaze

Birzo Seîd destnîşan kir ku eger temenê wan 11 yan 12 sal bûya, wê demê dihatin cezakirin û got:

"Lê di vî temenê wan ê niha de karê wan wekî sûc nayê dîtin û nayên cezakirin lê malbata keçikê tenê dikare li hemberî wê zerera ku gihîştiye wan qerebûyê (tezmînat) bixwaze."

 

Rudaw